ಉಪ್ಕಡ್ಲೆ-ಅಜ್ಜಿಕೂದ್ಲು, ಬೊಂಬೆ ಮಿಠಾಯ್-ಐಸ್ಕ್ಯಾಂಡಿ

ಪೋಂ ಪೋಂ ಹಾರ್ನು ಹೊಡ್ಕಂಡ್
ಹ್ವಾತುದ್ ಗಡ್ಡುದ್ ಸಾಬ್ರು ಸೈಕಲ್ ಬಂತಂದ್ರೆ
ಆಡ್ತಿದ್ ಆಟನೂ ಬುಟ್ ಒಡೋಗವಿ....!

ಬ್ಯೋಲಿಅಡೆ, ಅಟ್ಟುದ್ ಮ್ಯಾಗೆ
ಹಿತ್ಲಾಗೆ...ಕೊಟ್ಗೆವಳ್ಗೆ ತಡ್ಕಾಡ್ಬುಡವಿ
ಕಣ್ಣಿಗ್ ಕಾಣ್ದಂಗ್ ಬಚ್ಚಿಟ್ಟಿದ್ರು ಹುಡುಕ್ಬುಡವಿ ಅಲ್ವೆನಾ...?

ಕಾಲಿಬಾಟ್ಲು-ತುಕ್ಕಿಡ್ದ ತಗ್ಡು, ವಡುಕ್ಲು ಪಿಲಾಸ್ಟಿಕ್-ಕಬ್ಣ
ಕೈಸಿಕ್ಕಿದ್ ಯೋನಾರೊಂದ್ ಕೊಟ್ರೆ
ಉಪ್ಕಡ್ಲೆ-ಅಜ್ಜಿಕೂದ್ಲು, ಬೊಂಬೆ ಮಿಠಾಯ್-ಐಸ್ಕ್ಯಾಂಡಿ ಸಿಗಾದು..!

ಉದುರಿದ ತಲಿಕೂದ್ಲ ಸೂರಿಗೆ ಸಿಗ್ಸಿಟ್ಟು
ಚವ್ಲಿ ಮಾಡಿಸ್ಕೊಳ್ಲೋರು ಅಜ್ಜೀರು
ಕೂಡಿಟ್ಟ ಕೂದ್ಲು ಕ್ವಟ್ರೆ ಬಾಚಣ್ಗೆ ಕ್ವಡಾರು...!

ಯೋನ್ಮಜಿತ್ತಲ್ಲೆನ ಅವಾಗ್ಲೆಲ್ಲ
ಲಾರೋ..ಬಸ್ಸೋ ಮನಿ ಮುಂದ್ ಸಬ್ದ ಮಾಡಿರೆ
ಜಗ್ಲಿ ಮ್ಯಾಕ್ ವೋಡ್ಬಂದ್ ನೋಡ್ತಾ ನಿಲ್ಲೊವಿ...!

ಕಾಕಿ ಬಟ್ಟೆ ತೊಟ್ಕಂಡ್, ಟೊಪ್ಪಿ ಹಾಕಂಡ್
ಲಾಟಿ ಹಿಡ್ಕಂಡ್, ಕಪ್ಪನೆ ಬಾರುದ್ಬೂಟಾಕಂಡ್
ಪೋಲಿಸ್ನೋರ್ ನಡಿಕಂಡ್ ಬಂದ್ರೆ ಅವುತ್ಕಳ್ಳವಿ...!

ಹಳಿಮ್ಯಾಲೋಗೋ ಚುಕುಬುಕು ರೈಲ್ಕಂಡ್ರೆ
ಆಕಾಸ್ದಲ್ ಹಕ್ಕಿಯಂಗ್ ಇಮಾನ ಹಾರ್ಬಂದ್ರೆ
ಬೆಪ್ಪರ ಬೆರ್ಗಾಗಿ ಟಾಟಮಾಡಿ ನೋಡ್ಕಳ್ದೋಗವಲ್ವೆನಾ...?

ಸೂಟು ಬೂಟು ಹಾಕ್ದೋರ್ಕಂಡ್ರೆ ಪಾರಿನರನ್ಕಳವಿ
ಸುಮ್ ಸುಮ್ಕೆ ಅವ್ರಿಂದೆಮುಂದೆ ತಿರ್ಗಾವಿ
ಯಾರ್ಮನಿಗಾರು ರೇಡ್ಯೋ ತಕ್ಕಬಂದ್ರೆ ದೊಡ್ವಿಷ್ಯಲ್ಲೆನ...?
-ಮಯಾಸ