ಬುಡತ್ಲೆಗೆ...!

ಇಬ್ರೂ ಸೇರ್ಕಂಡೆ
ಒಪ್ಕಂಡೆ ಪಿರೂತಿ ಮಾಡಿದ್ವಿ
ನನ್ ಮರ್ತ್ ನೀ-
ಗಟ್ಮುಟ್ಟಾಗ್ ಗುಂಡ್ಕಲ್ ಇದ್ದಂಗಿದ್ದೀ
ಮತ್ ನಾ ಯಾಕ್ 
ಕಣ್ಣೀರಾಕಂಡ್ ಗೋಳಾಡ್ಕಂಡ್
ಕಾಲ ತಳ್ಲೀ ಮಾರಾಗಿತ್ತಿ
ನಗ್ಸೋರ್ ಸಿಕ್ಕೇ ಸಿಗ್ತಾರ
ನಕ್ಕಂಡ್ ನಕ್ಕಂಡೆ
ಕಾಲಕಳಿತೀನ್ ಬುಡತ್ಲೆಗೆ...!
-ಮಯಾಸ

ಬೆಳ್ಯೋಸಿರಿ ಮೊಳ್ಕೇಲ್ ತಿಳಿ ಅನ್ನೋ ಗಾದಿ ಮಾತ್ ದಿಟಲ್ವೇನಾ...?

ಕಂಡೋರ್ ತ್ವಾಟಕ್ ನುಗ್ಗಿ
ಕಿತ್ಲೆ, ಹಲ್ಸು, ಸೀಬೆಹಣ್ ಕದ್ಯಕ್ಕೋಗಿ 
ಮೈ-ಕೈ ತರುಚ್ಸ್ಕಂಡ್ ಬಂದು
ಹಿರಿಕ್ರಿಂದ ಗೂಸತಿಂದ್ ಬೈಸ್ಕಳ್ತಿದ್ವಿ...!

ಹರ್ಯೋನೀರಲ್- ಆಳುದ್ ಕೆರೇಲಿ

ಕದ್ಮುಚ್ ಈಜಾಡುದ್ ಮ್ಯಾಕೆ
ಮೈಕೈಗೆಲ್ಲ ಮಣ್ ತಿಕ್ಕಂಡ್ ಬಂದ್ರು
ಮನ್ಯೋರ್ ಕೈಗೆ ಸಿಗೇ ಬೀಳ್ತಿದ್ದಿ...!

ಯಾರ್ಮನೆದೇ ಆಗ್ಲಿ ನಾಟಿಕೋಳಿ ಕಂಡ್ರೆ
ವದ್ದೆ ಮಾಡಿದ್ ಬಟ್ಟೆ ಬಿಸಾಕಿ ಕೋಳಿ ಕದಿತಿದ್ವಿ
ವಾರ್ಗೆ ಐಕ್ಳು ಸೇರ್ಕಂಡ್ ಕಾಡಬ್ಬ ಮಾಡ್ಕೋತಿದ್ವಿ
ಎಷ್ಟ್ ಯಚ್ರಿಕೆ ವಯ್ಸಿರು ಮತ್ ಸಿಗಾಕ್ಕೋತಿದ್ವಿ...!

ಲಕ್ಷ್ಮಿ-ಸರ್ಸ್ವತಿ ಪೂಜೆ ಹೆಸ್ರೇಳಿ
ಅತ್ತು ಕರ್ದೂ ಮನಿಂದ್ ಕಾಸ್ ಇಸ್ಕೋತಿದ್ವಿ
ಬಾಡ್ಗೆ ಸೈಕಲ್ ಕಲ್ಯೋಕ್ಕೋಗಿ ಬಿದ್ ಬತ್ತಾ ಇದ್ವಿ
ಶಾಲಿಗ್ ಹೋಗ್ದೆ ಕದ್ ಕೂತು ಮನಿಗ್ ಹೋಗಾಕ್ ಹೆದ್ರುತಿದ್ವಿ..!

ಯೋನ್ ಮಾಡಿರು ಸಿಗಾಕೊಳಾವಿ-ಮನಿಗೋಗಾವಿ
ಕ್ವಾಣೆಲ್ಕೂರ್ಸಿ ಮೆಣ್ಶಿನ್ಕಾಯ್ ಹೋಗೆ ಹಾಕೋರ್
ಬಾರ್ಕೋಲ್ ತಕ್ಕಂಡ್ ಬಾಸುಂಡೆ ಬರಂಗ್ ಪೆಟ್ ಕೊಡಾರು
ದಂಡ್ಸಿ ಸುಮ್ಕಾತಿರ್ಲಿಲ್ಲ ಊರೆಲ್ಲ ಸಾರೋರು..!

ಮೈಮೂಳೆ ಬೆಂಡ್ ತೆಗ್ಯೋದ್ ಸಯ್ಸೋಕಾಗ್ದೆ
ಬೆಳ್ ಬೆಳಿತ ಚಾಳಿ ಬಿಡ್ದೆ ಬ್ಯಾರೋನು ತೋಚ್ತಿರ್ಲಿಲ್ಲ
ಮತ್ಮತ್ ಸಿಗಾಕಂಡ್ ಅವ್ಮಾನ ಸಯ್ಸೋದ್ ಅಬ್ಯಾಸ ಆಗ್ಬುಟ್ಟಿರದು
ಗೆದ್ರೂ ಹಿಗ್ತಿರ್ಲಿಲ್ಲ-ಸೋತ್ರು ಕುಗ್ತಿರ್ಲಿಲ್ಲ ಮರ್ಳಿ ಯತ್ನ ಮಾಡೇ ತೀರೆವು..!

ಈಗ್ನ್ ಐಕ್ಳು ಒಂದ್ ಅಂಕ ಕಮ್ಮಿ ತಗಂಡ್ರು ಪುಕ್ಲುಗುಡ್ತಾವೆ
ದ್ವಡ್ ಪರೀಕ್ಷೆಲಿ ಪೇಲಾದ್ರಂತು ತರ್ಗುಟ್ ಹೋತ್ತಾವೆ
ಸಣ್ ಸುಳ್ಳೇಳಿ ಸಿಗಾಕಂಡ್ರು ಅಳೋಕ್ ಶುರಾತ್ತವೆ
ಬೆಳ್ಯೋಸಿರಿ ಮೊಳ್ಕೇಲ್ ತಿಳಿ ಅನ್ನೋ ಗಾದಿ ಮಾತ್ ದಿಟಲ್ವೇನಾ...?

ಸಣ್ಪುಟ್ ಅವ್ಮಾನ ಸಯ್ಸೋದು...ಮತ್ ಚಾಟಿಬಿಲ್ ಆಡ್ ನಲ್ಯೋದು
ಮಾಡಿದ್ ತಪ್ಗೆ ಹೆತ್ತೋರ್ಕೊಡೋ ಶಿಕ್ಷೆ ಅನ್ವಬ್ಸೋದು
ಬದುಕ್ನ ಬಂದಂಗ್ ದೂಡ್ಕಂಡ್ ಹ್ವಾಗಾದ್ ಕಲುತ್ಕಬೇಕ್ ಕನ
ಜಾಣುಗ್ ಮಾತಿನ್ಪೆಟ್ಟು ಕ್ವಾಣುಗ್ ದೊಣ್ಣೆ ಪೆಟ್ ಸರಿತ್ತಲ್ವೇನಾ...???
--ಮಯಾಸ

ಹರ್ದೋದ್ ಬಟ್ಟಿದ್ರ ಕವ್ದಿ ಹ್ವಲ್ದ್ಕಂಡ್ ಕೂರಾರು

ವಳ್ಳುಕ್ ವನ್ಕೆಹಾಕ್ ಕುಟ್ವಾಗ
ಬೀಸೋ ಕಲ್ನಾಗ ಹಿಟ್ಮಾಡ್ವಾಗ
ಮುನುಸ್ಕಂಡವ್ರು ಕುಂತಿದ್ರು
ಪದುಕ್ ಪದ ಹಾಡೋರು...!

ರಾಗುಕ್ ರಾಗ ಸೇರ್ಸೋರು

ಪದ ಹಾಡ್ತಾನೆ ಮುನ್ಸ್ ಮರ್ಯಾರು
ಮನ್ಸತ್ವ ಮೆರ್ಯಾಕ್ ಕುಂತ್ರ
ಹೊಸ ಪದುಕ್ ಹುಟ್ ಕೊಡಾರು...!

ಮಾತ್ ಮಾತಾಡ್ತಾನೆ ಮಾರುದ್ದ ಹೂ ಕಟ್ಟೋರು
ಕತೆ ಹ್ಯೋಳ್ತಾನೆ ಕಾಳುಕಡ್ಡಿ ಬಿಡ್ಸಾರು
ಸೊಪ್ ಸೋಸ್ತಾನೆ ಸೋಬನೆ ಪದ ಕಟ್ಟೋರು
ಬದುಕ್ ಮಾಡ್ಕಂಡೆ ಬುಟ್ಟಿಗಿಟ್ಟಿ ನೇಯೋರು..!

ಹರ್ದೋದ್ ಬಟ್ಟಿದ್ರ ಕವ್ದಿ ಹ್ವಲ್ದ್ಕಂಡ್ ಕೂರಾರು
ಊಟಾದ್ಮೇಕಿ ಎಲಿಅಡ್ಕಿ ಜಿಕ್ಕಂಡ್ ಹರ್ಟಿ ಹೊಡ್ಯಾರು
ಇತ್ತಿತ್ಲಾಗ ಮುಕುಕ್ ಮುಕ ಎದ್ರುಬದ್ರಾದ್ರೂ
ಒಬ್ರೊಬ್ರು ಕೂಡ ಮಾತಿಲ್ಲ ಕತಿಲ್ಲ...ಯಾಕಿಂಗಾತೋ...???
--ಮಯಾಸ

ಅವ್ರವ್ರ್ ವಗ್ಟ್ ಅವ್ರವ್ರೆ ಬಿಡ್ಸ್ಕ ಬ್ಯೋಕಲ್ವೇನಾ...?!?

ಜಗ್ಲಿ ಮ್ಯಾಲೋ... ವಟಾರ್ದಲ್ಲೋ
ಪುರ್ಸೊತ್ಮಾಡ್ಕಂಡ್ ಕುಕ್ರಬಡ್ಕಂಡ್
ವಗಟೇಳ್ಕಂಡ್  ವಗುಟ್ಬಿಡ್ಸ್ಕಂಡ್
ಬುಲ್ಡೆಗೆ ಕೆಲ್ಸಕೊಡ್ತಿದ್ವು ಅಲ್ವೇನ...?

ಆಕಾಶುದ್ ಮದ್ಯುದಲ್ ಕಪ್ಚುಕ್ಕಿ ಅಂದ್ರೆ
ಓಹೋಹೋ ನಂಗೊತ್ತಾತು ಕಣ್ಣು ಅನ್ನವಿ
ವಗ್ಟೇಳೋದ್ರಾಗ ಎತ್ತಿದ್ ಕೈ ಅನ್ನೋರ್ಗೆ
ಉತ್ರುವೇ ಇಲ್ದ ವಗ್ಟೇಳಿ ಆಟಾಡ್ಸವಿ..!

ಯಾರ್ಯಾರ್ಗೋ ಕ್ಯೊಳಿದ್ ವಗ್ಟು
ಉತ್ರುವೇ ಸಿಗ್ದೇ..ಒಡಾಡ್ತಿರದು
ಕೆಲ್ವ್ ವಗ್ಟಂತು ಸಿಕ್ ಸಿಕ್ಕಾಗಿರಾವು
ಸಿಕ್ ಸಿಕ್ಕರ್ನೆಲ್ಲ ಕ್ಯೋಳಂಗಾಗದು...!

ಇತ್ತಿತ್ಲಾಗೆ ಬದ್ಕಿಗೆ ಬದ್ಕೆ
ವಗ್ಟಾಗ್ ಹ್ವಾಗಿರ್ಬೇಕಾರೆ
ವಗ್ಟ್ ಹ್ಯೋಳೋರೆ ಇಲ್ದಂಗಾಗೈತೆ
ಇನ್ ವಗ್ಟ್ ಬಿಡ್ಸಾರ್ ಯೊಲ್ಲಿಂದ ಬಂದಾರು..?

ದಿನ್ವಿಡಿ ಬಿಸಿಬಿಸಿಯಾಗಿರರು
ಬದುಕ್ ದೂಡಕ್ ಹೆಣ್ಗಾರ್ ನಡ್ವೆ
ಪುರ್ಸೊತ್ತನ್ನದೇ ವಗ್ಟಾಗಿರ್ಬೇಕಾರೆ
ಅವ್ರವ್ರ್ ವಗ್ಟ್ ಅವ್ರವ್ರೆ ಬಿಡ್ಸ್ಕ ಬ್ಯೋಕಲ್ವೇನಾ...?!?
  -ಮಯಾಸ

ಆತ್ರುಗೆಟ್ರ ಯಡ್ವಿ ಬೀಳ್ಲೇಬೇಕಲ್ವೆನಾ...?!?

ಮನ್ಯಾಕಿ ಕೆಮ್ಮೋಳಾದ್ರು 
ನಮ್ಮೋಳೆವಾಸಿ
ಅನ್ನೋ ಗಾದಿ ಮಾತ್ಗ
ಮರ್ಮಾತಾಡಂಗಿಲ್ಲ ಅಲ್ವೇನಾ..?

ವೇದ್ಸುಳ್ಳಾದ್ರು

ಗಾದಿ ಮಾತ್ ಸುಳ್ಳಲ್ಲನ್ನೋ ಗಾದಿ ಮಾತ್
ಮರ್ತ್ ಮಲ್ಗಂಗಿಲ್ಲ ಅಲ್ವೇನಾ
ಹಿರಿಕ್ರು ಸುಮ್ ಸುಮ್ಕೆ ಹ್ಯೋಳಿಲ್ಲ ಕನ ..!

ಹಾದಿಬೀದಿಲ್ ತಿರ್ಗೋರ್ಕಂಡ್
ತಿಗ್ಣಿ ತಿರುಗ್ದಂಗ್ ಯಾಕ್ ತಿರುಗ್ತೀ
ಅಂತಿದ್ ಗಾದಿ ಮಾತ್ ಮರುತ್ ಮ್ಯಾಕ
ಹ್ಯೋಳೋರ್ ಕ್ಯೋಳೋರ್ ಇಲ್ದಂಗಾಗೈತಿ ಅಲ್ವೇನಾ..?

ಯಾರಾನ ವಸಿ ಎಗ್ರಾಡ್ತಿದ್ರ
ಕಟ್ಟೆಮ್ಯಾಲ್ ಕೂತಜ್ಜ ಕುಂತಲ್ಲೆ ಹ್ಯೋಳಾನು
ನಣ್ಕರ್ಗೋವರ್ಗೂ ಎಗ್ರಾಡ್ತಾನಷ್ಟೆಯ
ಎಗ್ರಾಡ್ದೋನ್ ಕುಕ್ರುಬಡ್ಲೆಬೇಕನ್ನನು ಕನ..!

ಗಾದಿಮಾತಲ್ಲೆ ನೀತಿ ಹ್ಯೋಳಾರು
ನಡಿ..ನುಡಿ ತಿದ್ ತೀಡರು
ತಡುದ್ ನಡುದ್ರ ಬದ್ಕು ಹದ ಅನ್ನರು
ಆತ್ರುಗೆಟ್ರ ಯಡ್ವಿ ಬೀಳ್ಲೇಬೇಕಲ್ವೆನಾ...?!?
-ಮಯಾಸ

ಸರ್ಕಸ್ ನೋಡ್ತಾನೆ ಬೀದಿನಾಯ್ಗೆ ಪಲ್ಟಿ ಹೊಡ್ಸೋ ಪಿಲಾನು ಮಾಡವಿ

ಕೋಲೆ ಬಸ್ವುನ ನೋಡ್ಕಂಡ್
ಬುಡುಬುಡುಕೆ ಸವುಂಡು ಕ್ಯೋಳ್ಕಂಡ್
ಚಾಟಿ ಮಾರಮ್ಮುನ್ ವರ್ಸೆ ನೋಡ್ತಾನೆ
ದಿನ ದೂಡ್ಕಂಡ್ ಕಾಲ ಕಳ್ಯೋ ಕಾಲೊಂದಿತ್ತು..!

ಊರ್ಕೇರಿಲಿ ವರ್ಷುಕ್ಕೊಂದ್ 

ಶನ್ದೇವ್ರ ನಾಟ್ಕ ಆಡಾರು
ಹಬ್ಬುಕ್ಕೋ ಹುಣ್ಮೆಗೋ
ಚಕ್ಳುಗೊಂಬೆ, ಬಯ್ಲಾಟ ಆಡಾರ್ ಬರಾರು..!

ವಾರುದ್ ಸಂತೇಗೋದ್ರೆ
ಜನ ಗುಂಪ್ಸೇರ್ಕಡವ್ರಂದ್ರ
ಹಾವಾಡ್ಸೋನ್ ಹಾವಿನಾಟ
ಕೋತಿ ಸರ್ಕಸ್ಸು, ದೊಂಬ್ರಾಟ ನಡೀತಿರಾದು..!

ಜಾತ್ರೆ-ಸುಗ್ಗಿ, ಊರ್ಸೇವೆ-ಹರ್ಸೇವೆ ಬಂತಂದ್ರ
ಟೆಂಟಲ್ಲಿ ಕಂಪ್ನಿ ಸರ್ಕಸ್ಸು, ಕಂಪ್ನಿ ನಾಟ್ಕ
ಯಕ್ಷಗಾನ ಯೋನಾರೊಂದ್ ನಡ್ದೇ ನಡ್ಯೋದು
ಮನಿಂದಲೇ ಜಮ್ಕಾನನೋ ಚಾಪೆನೋ ಎತ್ಕಂದೋಗ್ಬೇಕಿತ್ತು..!

ಚಾಟಿ ಮಾರಮ್ಮುಗೆ ಕಾಳ್ಕಡ್ಡಿ ಕೊಡ್ಬೇಕಿತ್ತು
ಶನ್ದೇವ್ರ ನಾಟ್ಕ ನೋಡೋಕೋಗೋರು ಮಾಂಸ ಮಡ್ಡಿ ತಿನ್ತಿರ್ಲಿಲ್ಲ
ಸರ್ಕಸ್ ನೋಡ್ತಾನೆ ಬೀದಿನಾಯ್ಗೆ ಪಲ್ಟಿ ಹೊಡ್ಸೋ ಪಿಲಾನು ಮಾಡವಿ
ಇತ್ತಿತ್ಲಾಗೆ ಟಿವ್ಲಿ ದಾರ್ವಾಯಿ...ಮಾಲ್ಲಿ ಸಿನ್ಮಾ ನೋಡಂಗಾಗ್ಬುಟೈತೆ ಅಲ್ವೇನಾ...???
-ಮಯಾಸ

ಯೋಟ್ ಅಡ್ವಿದ್ರೂ ನೆರೆ ಹೊರೇರ್ ನೆಚ್ನಡ್ಯೋರು..!

ಅಯ್ಯಾ ಯೋಟ್ ಸಲೀಸು ಅಂತೀರಿ
ಎಂತದ್ ಬೆಳ್ಯದೂ ಹೂವೆತ್ತಿಟ್ಟಂಗಿರದು
ಕಾಸ್ ಇಸ್ಕಳ್ದಂಗೆ ಕೇಮೆ ಮಾಡ್ಕೊಡಾರು
ಎಲ್ರೂ ಮನಿ ಕೇಮೆಗೆ ಎಲ್ರೂ ಮುಯ್ಯಾಳೆ..!

ಎತ್ತಿರೋನು ಎತ್ ಮುಯ್ಯಾಳು

ಉಳೋಕ್ ಬರೋರ್ ಉತ್ಕೊಡಾರು
ಹೊರೆ ಹೊರಾರು ಹೊತ್ಕೊಡಾರು
ಬರೋ ಕೇಮೆನೆ ದಿನೂದ್ ಲೆಕ್ದಲ್ಲಿ ಮಾಡ್ಕೊಡಾರು..!

ಹೆಚ್ಬೂಮಿ ಇತ್ತೋ ಗುತ್ಗೆಕೊಡಾರು
ಬೂಮ್ನನ್ದೆ ಯೋನಾರ ಬೆಳ್ಕೋ-ಬೆಳ್ಬಂದ್ಮೇಕೆ
ಬಂದುದ್ರಲ್ ಇಟ್ಕಂಡ್ ವಸಿ ಕೊಡನ್ನರು
ಬೆಳಿ ಕೈಕೊಟ್ರ ಮುಂದಿನ್ವರ್ಷ ಸೇರ್ಸ್ ಕೊಡನ್ನರು..!

ಒಬ್ರುನೊಬ್ರೂ ಯೋಟ್ ನಂಬರಲ್ವೇನಾ...???
ನಿನ್ಮನಿ ಬದ್ಕಿಗೆ ಜತಿಗ್ ನಾ ಇರ್ತೀನನ್ನೋರು
ಇಲ್ದೋರ್ಬಗ್ಗೆ ಕೈನೀಡ್ ಕೊಡಾರು
ಯೋಟ್ ಅಡ್ವಿದ್ರೂ ನೆರೆ ಹೊರೇರ್ ನೆಚ್ನಡ್ಯೋರು..!

ಬೆಳ್ದ್ ಬೆಳೆಯ ಹಂಚ್ಕಂಡ್ ತಿನ್ನಾರು
ಬೆಳಿಗ್ಬೆಳೇನೆ ಬದ್ಲಾಯ್ಸಕೊಳ್ಳಾರು
ಈಗೆಲ್ವೂ ಬದ್ಲಾಗೈತೆ ಮನುಷ್ರ ಮನುಷ್ರೇ ನಂಬಾಕಿಲ್ಲ
ಮನ್ಸ್ ಮನ್ಸೇ ಚೆಟ್ಟೋಗೆವೆ ಅಲ್ವೆನಾ...?!?
-ಮಯಾಸ

ವಳ್ದಾರಿಲಿ ನಡ್ಯೋರ್ ಅಲ್ವೇನ..?

ಎತ್ತಿನ್ ಗಾಡಿಲಿ 
ಎಲ್ಗಾರ ಹೋಗೋ ಕಾಲ್ದಲ್ಲಿ
ನಡ್ಕಂಡ್ ಹೋಗೋರು
ವಳ್ದಾರಿಲಿ ನಡ್ಯೋರ್ ಅಲ್ವೇನ..?

ಶಿಳ್ಳೆ ಹಾಕಂಡ್ ನಡ್ಕಂಡ್ ಹೊಂಟ್ರೆ

ಕಾಡಣ್ಣು ತಿನ್ನಕ್ ಸಿಗಾವು
ಜರಿತ್ವರೆ ನೀರ್ ದಾವ್ ಇಂಗ್ಸಾದು
ಹಕ್ಕಿಗಳ್ ಚಿಲಿಪಿಲಿ ಸದ್ ಕಿವಿಗ್ಬೀಳದು..!

ಈಗೆಲ್ಲ ಹಂಗಿಲ್ ಬುಡತ್ಲೆಗೆ
ಎಕ್ಕಡಿಕ್ ಹ್ವಾಗ್ಬೇಕಂತ್ ಗೊತಿದ್ರಸಾಕ್
ಯೇನಾರ ಸಿಗ್ತಾವೋ, ಹ್ವಳ್ಳಾಡ ಹೊತ್ಗೆ
ಯಕ್ಕಡಿಕ್ ಹೋಗ್ ಯತ್ಲಾಗ್ ಬಂದ್ವೋ ತಿಳಿವಲ್ದು..!

ಮನುಸ್ರು ನಡ್ಯೋ ದಾರ್ಯಾಗ
ಗರ್ಕೆ ಹುಲ್ಲು ಬೆಳಿತಿರ್ಲಿಲ್ಲ ಗೊತ್ತೇನ..?
ಇತ್ತಿತ್ಲಾಗೆ ವಳ್ದಾರಿಗಳು ರಹದಾರಿಗಳಾಗ್ಯಾವ
ಆದ್ರಿಲ್ಲಿ ತಲೀಲ್ ನಡ್ಯೋರ್ ನಡ್ಯಾಕ್ ಹತ್ಯಾರ...!

ರಾತ್ರಾದ್ರ ದಂದೆ ನಡುಸ್ತಾರ
ಹಗ್ಲೊತ್ತೆ ದರೋಡೆ ಮಾಡ್ತರ..!
ನೋಟ್ಕೊಟ್ ವೋಟ್ ತಕ್ಕಂಡ್
ಜನ್ಸೇವೆ ಮರ್ತು ಅವ್ರುಸೇವ್ಗೆ ಮುಂದಾಗ್ಯಾರ..!

ಖಾಕಿ, ಕಾವಿ, ಕಾದಿ, ಕರಿ ಧಿರಿಸಾಕ್ದೋರು
ಜೈಲ್ಪಾಲಾಗ್ತಾ ಬಿರ್ಯಾನಿ ಬಿಕ್ಷೆ ಬೇಡಾಕತ್ಯಾರ
ವಳ್ದಾರಿಲಿ ವಳ್ಳೇರ್ ನಡ್ಯೋ ಕಾಲೋಗಿ
ಕಳ್ರು..ಮೋಸ್ಗಾರ್ರು ಮೆರ್ಯಾಕ್ ಹತ್ಯಾರಲ್ವೇನಾ....?
-ಮಯಾಸ

ಮನ್ಷತ್ವ ಅನ್ನೋದಿದ್ರೆ ಬೆಲಿ ಅಲ್ವೇನಾ...?

ಮನಿ, ಹ್ವಲ-ಗದ್ದಿ-ತ್ವಾಟ
ಇದ್ಕಡಿ ಒಂದ್ ಬೇಲಿ ಅಂತಿರಾದು...!

ಬಾಗ್ಲಂತ್ ಇದ್ಮ್ಯಾಲ
ಚಿಲ್ಕ ಬೋಲ್ಟಂತಿರಾದು...!

ಉತ್ತಿದ್ ಬೂಮಿ ಹಾಳ್ ಬುಡ್ತಿರ್ಲಿಲ್ಲ
ಏನಾರ ಒಂದ್ ಬಿತ್ತೋರು...!

ಕಣ್ಜ ಇದ್ಮ್ಯಾಲ ಖಾಲಿ ಇರ್ತಿರ್ಲಿಲ್ಲ
ಬೆಳ್ದ್ ಬೆಳಿ ಮಡ್ಗಾರು...!

ಕೊಟ್ಗಿ ಅಂತ್ ಕಟ್ಟಿದ್ ಮ್ಯಾಕ
ಅದ್ರೊಳ್ಗ ದನ-ಕರ, ಆಡು ಏನಾರಿರವು...!

ಮಳ್ಬಂದ್ ಹೊಳಿಳ್ದ್ರೆ ಬಂದ್ಮೀನ್ ಕೊಚ್ಚೋಗಿದ್ರೂ
ಮರ್ಳಾದ್ರೂ ಹ್ವಳಾಡೆಲಿ ಬಿದ್ದಿರೋದು....!

ಆದ್ರ..ಮನ್ಷಾ ಅಂತಿದ್ಮೇಲೆ ಮನ್ಸಂತಿರುತ್ತೆ
ಅದ್ರೊಳ್ಗ....ಮನ್ಷತ್ವ ಅನ್ನೋದಿದ್ರೆ ಬೆಲಿ ಅಲ್ವೇನಾ...?
-ಮಯಾಸ

ಕಾಲುಕ್ ತಕ್ನಾಗ್ ಮೂರ್ಕಾಲು ಸರಾಗ್ಬೇಕಲ್ವೆನಾ..???

ಮಳ್ಸುರಿತಿದ್ರೂ -ಬಿಸ್ಲು ಹ್ವಡಿತಿದ್ರೂ
ಮಂಜ್ ಕವ್ಕಂಡಿದ್ರೂ-ಚಳ್ ಕ್ವರಿತಿದ್ರೂ
ಬೂಮಿ ನೆಚ್ಕಂಡ್ ಚೇಮೆ ಮಾಡರ್ಗೆ
ಪುರ್ಸೊತನ್ನದೇ ಇರಾಕುಲ್ಲ ಕನ...!

ಮಳ್ ಸುರಾದ್ರೆ ಬೆಳ್ಬೀಜಾದಂಗೆಯ

ಮಳ್ ನಿಲ್ಲಂಗ್ ಕಂಡ್ರ ನಾಟ್ ಸುರಾತ್ತದೆ
ಬಿಸ್ಲು ಕಂಡ್ಕೂಡ್ಲೆ ಬೆಳ್ದ್ಗ್ ಬೆಳೆ ವಣುಗ್ಸದೆಯಾ
ಸರ್ಯಾಗ್ ಚಳ್ ಹೊಡ್ದ್ರೆ ಬಿರ್ಕ್ಬುಟ್ ನೆಲೂ ಹದಾತದೆ..!

ಮಳಿ, ಚ್ವಳಿ, ಬಿಸ್ಲು ನೆಟ್ಟುಗಾಗುದ್ವರ್ತು
ನೆಚ್ಕಂಡ್ ಬೆಳಿ ಕೈ ಕೊಟ್ಟಂಗೆಯಾ..!
ಬೆಳಿ ಇಲ್ಲುದ್ ಮ್ಯಾಕ ಮತ್ಯಂತದೈತಿ
ಬಾಳ್ ಪಾಡ್ ಕ್ಯೋಳಂಗಿಲ್ಲ ಅಲ್ವೇನಾ...?

ವರ್ಷಾನ್ ಮೂರ್ಕಾಲ್ದಾಗ
ಮ್ಯಾಲ್ ಕೆಳ್ಗಾ ನೋಡ್ಕಂಡೆ
ಮುಂದೋಗೋ ಮಂದ್ಗೆ
ಕಾಲುಕ್ ತಕ್ನಾಗ್ ಮೂರ್ಕಾಲು ಸರಾಗ್ಬೇಕಲ್ವೆನಾ..???
-ಮಯಾಸ

ಸವುಂಡ್ ಮಾಡದು ಬಂಡಾಯ್ದ್ ಸೂಚ್ನೆ ಅಲ್ವೇನಾ..?

ಸರ್ಪಾಟಕಿಯಂತ್ ಕನ್ಸ್ಗಳ್ 
ಹನ್ಮಂತನ್ ಬಾಲ್ದಂಗೆ
ಸರ್ಸರ್ನೆ ಉರ್ದೋದಂಗೆ
ನನ್ಸಾಗ್ಬೇಕನ....!

ಮೂಲೆ ಪಟಾಕಿಯಂಗೆ

ಮನ್ಸಿನ್ ಮೂಲೆಲಿರೋ
ಬಯ್ಕೆಗಳು ರಪ್ ರಪ್ಪನೆ
ಹೂವಿನ್ಕುಂಡ್ದಂಗೆ ಚುಮ್ತಿವೆಕನ..!

ಅನ್ಕಂಡಿದ್ ಆಗಾದಾದ್ರೆ
ಬಯ್ಸಿದ್ ಬರೋದಾದ್ರೆ
ಹಿಂದ್ ಮುಂದ್ ನೋಡಲ್ಲ ಕನ
ಆಕಾಶ್ಕೊಂದ್ ರಾಕೇಟ್ ಹಾರ್ಸದೆ ಕನ...!

ಚಿಕ್ಕೋನಿದ್ದಾಗ ಜಜ್ಜ ಪಟಾಕಿ ಕಲ್ಲಲ್ಲಿ ಜಜ್ಜುತಿದ್ದೆ
ಸ್ವಲ್ಪ್ ದೊಡ್ಡೋನಾದ್ಮೆಲೆ ಪಟಾಕಿ ಹಬ್ ಬಂದ್ರೆ
ಪಟಾಕಿ ಹೊಡ್ಯೋ ಕೋವಿ ಕ್ಯೋಳಿ ಪೆಟ್ತಿಂದ್ ನೆನ್ಪೈತಿ
ಈಗ್ ಬುಲೆಟ್ಟಾಕೋ ಕೋವ್ಗಳೇ ಬೇಕಾರು ಸಿಗ್ತಾವಲ್ವೇನಾ..?

ಈರುಳ್ಳಿ-ಬೆಳ್ಳುಳ್ಳಿ ಪಟಾಕಿ ಕಾಲೋಗಿ
ಲಕ್ಷ್ಮಿಪಟಾಕಿ-ಆನೆಪಟಾಕಿ-
ಆಟಂಬಾಂಬ್ ಕಾಲ್ಬಂತು ಅಲ್ವೇನಾ..?
ಸವುಂಡ್ ಮಾಡದು ಬಂಡಾಯ್ದ್ ಸೂಚ್ನೆ ಅಲ್ವೇನಾ..?
--ಮಯಾಸ

ಕೂಡ್ಕಳಿಯೋ ಸೇರ್ಸ್ ಗುಣ್ಸೋ ಲೆಕ್ಕ ಕಲಿತಿದ್ವಿ

ಲಗೋರಿ ಆಡ್ತಾನೆ
ಗುರಿ ಕಲಿತಿದ್ವಿ
ಚಿನ್ನಿದಾಂಡ್ ಆಡ್ತಾನೆ
ಚಿಗ್ರುಗೊಳ್ತಿದ್ವಿ

ಕುಂಟೆ ಬಿಲ್ಲೆ ಆಡ್ಕಂಡ್

ಕುಕ್ರುಬಡಿತಿದ್ವಿ
ಬಣ್ಣದ ಬುಗರಿಗೆ ದಾರ ಸುತ್ಕಂಡ್
ಗಿರಗಿರ ಗಿರಗಿರ ಗಿರುಗುಡಿಸ್ತಿದ್ವಿ

ಪಟ್ಟಿಮನೆ ಮಾಡ್ಕಂಡ್ ಕವ್ಡೆ ಬುಟ್ಕಂಡ್
ಎಂಟ್ಮನೆ ನಾಕ್ಮನೆ ಏಳ್ಮನೆಲಿ
ಕಾಯ್ ನೆಡ್ಸಕ್ಕಂಡ್ ಚೌಕಾಭಾರ ಆಡ್ತಾನೆ
ಕೂಡ್ಕಳಿಯೋ ಸೇರ್ಸ್ ಗುಣ್ಸೋ ಲೆಕ್ಕ ಕಲಿತಿದ್ವಿ

ಅಜ್ಜಿಮನೆ ಆಟಾಡ್ತಾ
ಹುಡ್ಕೋದ್ ಕಲಿತಿದ್ವಿ
ಕಣ್ಣಾಮುಚ್ಚೆ ಗಾಡೇಗೂಡೇ ಆಡ್ತಾನೆ
ಗೂಡ್ ಕಟ್ಕೊತ್ತಾ ಇದ್ವಿ

ಆವಾಟ-ಈವಾಟ
ಆಡ್ತಾಡ್ತಾನೆ ಬೆಳ್ಬೆಳಿತಾನೆ
ಸೋಲ್ಗೆಲ್ವಿನ್ ರುಚಿ
ಕಾಣ್ತಿದ್ವಿ ಅಲ್ವೇನಾ...!?!
-ಮಯಾಸ

ಮನ್ಯಂತಿದ್ಮೇಲೆ ಹಿಂದ್ಗಡೆ ಹಿತ್ಲಂತಿರದು

ಸ್ವಾರೆ ಕಾಯ್ಕೊಡಕ್ಕೆ ಮನೆಮ್ಯಾಕೆ
ಸರ್ರನೆ ಹಭ್ತಿದ್ ಬೀಳು
ಬಾಳೆಲೆಯಂಗೆ
ಬೇಗ ಬಾಗಲ್ಲ ಕನ..!

ಹದ್ವಾಗಿ ಹಬ್ಬೋ

ಬಸ್ಲೆ ಸೊಪ್ಪಿನ್ ಬಳ್ಳಿ
ದರ್ಗೆಲೆಹಂಗೆ ಯಾವಾಗ್ಬೇಕಾರ
ದರಿಗುರ್ಳಲ್ಲ ಕನ...!

ಅಲ್ಲಲ್ಲಿ ಬೆಳ್ಯೋ
ಹರ್ವೆಸೊಪ್ಪು-ದಂಟಿನ್ಸೊಪ್ಪು
ಕಣುಗ್ಲೆಸೊಪ್ಪು-ಬೆರ್ಕೆಸೊಪ್ಪು
ಬೂದ್ಗನ್ನಡಿಲ್ ಹುಡ್ಕಿರು ಕಾಣ್ದಂಗಾದ್ವಲ್ಲೋ..!

ಕೆರಿದ್ದಿದ್ರೆ ಕೆಸಿನ್ಸೊಪ್ ಸಿಗಾವು
ಕೆಸಿನೆಲೆ ಬುಡ್ದಲ್ಲಿ ಕೆಸಿನ್ಗೆಡ್ಡೆ ಇರಾವು
ಗೆರೆ ಇದ್ದಿದ್ರೆ ಗೆಡ್ಡೆಗೆಣ್ಸ್ ಸಿಗಾವು
ಕಾಂಕ್ರಿಟ್ ಬಂದ್ ಕೆರೆ-ಗೆರೆ ಮಾಯ್ವಾದ್ವಲ್ವೇನ..?

ಕಾಂಪೌಂಡ್ ಬರೋ ಮುಂಚ್ಗೆ
ಬೇಲಿ ಅಡೇಲಿ ಅನಾನಸ್ ಗಿಡ ಕಾಣವು
ಬೇಲಿ ಮೂಲೆಲಿ ಪಪ್ಪಾಯ್ ಗಿಡಿರಾವು
ಮನೆ ಹಿಂದ್ಗಡೆ ಟಮಾಟೋ ಗಿಡ ಇದ್ದೇಇರಾದಲ್ವೇನಾ..?

ಮನಿ ಮುಂದ್ಗಡೆ ಅಂಗ್ಳಿರಾದು
ಮನ್ಯಂತಿದ್ಮೇಲೆ ಹಿಂದ್ಗಡೆ ಹಿತ್ಲಂತಿರದು
ಅಂಗಯಗುಲುದ್ ಜಾಗ್ದಲ್ಲಿ ಆಕಾಶ್ದ್ ಎತ್ರುಕ್ಕೆ
ಮಾಡಿಮನೆ ಕಟ್ಟಂಗಾದ್ಮೇಲೆ ಕಣ್ಗಾಣವೆಲ್ಲ
ಮಾಯ್ವಾಗೋದ್ವು ಅಲ್ವೇನಾ...?!?
-ಮಯಾಸ

ಗುಡ್ಡೆ ತರ್ಕಾರಿನೂ ಚೌಕಾಶಿ ಮಾಡ್ಬೋದು

ಕೈಲ್ಲೊಂದ್ ಚೀಲ ಹಿಡ್ಕಂಡ್
ಸಂತ್ಗೋಗಿ ತರ್ಕಾರಿ ತರೋ ಮಜಾ
ಮಾಲ್-ಗಳಲ್ಲಿರಲ್ಲ ಅಲ್ವೇನಾ....?

ಗುಡ್ಡೆ ತರ್ಕಾರಿನೂ ಚೌಕಾಶಿ ಮಾಡ್ಬೋದು
ತೂಕಹಾಕಿದ್ ಮ್ಯಾಕು ಮುಲಾಜಿಲ್ದೆ

ಒಂದೆತ್ಕಂಡ್ ಬ್ಯಾಗ್ಗಾಕ್ಕೋಬೌದಿತ್ತು..!

ಚಿಕ್ಕೋನಿರ್ಬೇಕಾರೆ ಯಾರೊಟ್ಗಾರು
ಸಂತ್ಗೋದ್ರೆ ಎಲ್ಲ ತಕ್ಕಂದ್ ತಿರ್ಗ್ ಬರ್ವಾಗ
ಪುರಿ ಅಂಗ್ಡಿತ್ತಾಕ್ ಬಂದ್ಗೂಡ್ಲೆ ಬೋಂಡ ಆಸಾಗದು ಕನ..!

ಯಾವ್ಯಾವುರೋರೊ ಬಂದ್ ವ್ಯಾಪಾರ ಮಾಡಾರು
ಸುತ್ತೂರೋರ್ ಬಂದ್ ಸಂತೆ ಸುತ್ತೋರು
ವಾರ್ಕೊಮ್ಮೆ ಸಂತೆ ಮುಗ್ಸಿರೆ ಸಂಸಾರ್ ಸಾಗದು..!

ಮಾಂವ್ಸ-ಮಡ್ಡಿನೂ ಸಂತೇಲ್ಮಾರೋರು
ಇಡೀ ಸಂತೆಲಿ ವಣುಗ್ಲು ಮೀನ್ ಗಮ್ಗುಡೋದು
ಸೇಂದ್ಸರಾಯ್ ಅಂಗ್ಡಿ ಪಕ್ದಲ್ ಚಾಕ್ಣ ಮಾರೋರು..!

ಎಂಡ್ ಇಟ್ಗೆಮ್ಯಾಲ್ಕೂರ್ಸಿ ಚೌರಮಾಡರು
ಬೇಕ್ ಬ್ಯಾಡ್ವಾದ್ ಎಲ್ವೂ ಸಂತೇಲ್ ಕಾಣವು
ವಾರ್ಕೊಂದ್ ಊರಲ್ ಸಂತ್ ನಡ್ಯದು....!

ಮದ್ವಾಗೋ ಗಂಡ್-ಹೆಣ್ನ, ಹೆಣ್-ಗಂಡ್ನ
ಸಂತೇಲ್ ನೋಡ್ತಿದ್ ಕಾಲ್ ಕಳ್ದೋತಲ್ಲೋ ಮಾರಾಯ
ಕಾಸಿದ್ರೆ ಬೇಕಾದ್ ಕಾಲ್ ಬಡ್ಡಿಗ್ ಬರಂಗಾತಲ್ವೇನಾ...???

-ಮಯಾಸ

ತಿನ್ನೋಕ್ಕಾಗ್ ಬದ್ಕಂಗೆ ಕಾಲ್ಬದ್ಲಾತಲ್ವೆನಾ...?

ಕವ್ಲಿ ನೀರಲ್ ಕೈ ತೊಕ್ಕಂದ್
ಗದ್ದೆ ಬದೀಲ್ಕುಂತು
ಬುತ್ತಿ ಬಿಡಿಸ್ಕಂಡು
ಬಾಳೆಲೆ ಹರ್ಡ್ಕಂಡ್ ಬಡಿಸ್ಕಂಡ್
ಬಾರ್ಸೋ ಮಜ ಪ್ಲೇಟ್ ಮೀಲ್ಸಲಿಲ್ಲ ಕನ..!

ಸೌದೆವಲೀಲಿ, ಮಣ್ಣಿನ್ಮಡ್ಕೆಲಿ
ಮುಳ್ ಹೊಡ್ಸಿದ್ ಒಳ್ಕಲಲ್ಲಿ
ಕಾರಕಡ್ದು , ರುಬ್ ಮಾಡ್ತಿದ್
ಸೊಪ್ಸಾರಿನ್ಗಮ ಮಿಕ್ಸಿ, ಗ್ರೈಂಡರ್
ಬಳ್ಸಮಾಡ್ರೆ ಗಮ್ಗುಡಲ್ಲ ಕನ...!

ತಿನ್ನಕ್ ಬೇಕಾದ್ನ ಬೆಳ್ಯೋ ಕಾಲೊಂದಿತ್ತು
ಕಾಸಿನ್ ಬೆಳೆ ಬೆಳ್ಯಾಕ್ ಸುರಾದ್ ಮ್ಯಾಲೆ
ತಿನ್ನವೆಲ್ಲವೂ ಪ್ಯಾಕೆಟಲ್ ಸಿಗ್ತಾವೆ
ಬೆಳ್ಯೋ ಬೆಳೆ ಬೀಜುಕ್ಕೆ ವಿಮಾನ ನೋಡಂಗಾತಲ್ಲ
ಬದ್ಕೋಕ್ ತಿನ್ನೋ ಕಾಲೋಗಿ
ತಿನ್ನೋಕ್ಕಾಗ್ ಬದ್ಕಂಗೆ ಕಾಲ್ಬದ್ಲಾತಲ್ವೆನಾ...?

ತಿನ್ನೋ ಮುಂಚ್ ಎಡಿಂದ್
ನಾಯ್ಗೋ, ಕಾಗ್ಗೋ, ಕೋಳ್ಗೋ
ಒಂದೆಂಡ್ ಗುಕ್ ಕಟ್ಟಿಡ್ತಿದ್
ನೋಡ್ಕಂಡ್ ಬೆಳ್ದ್ ಕಣ್ಮುಂದೆ
ಮಂಕ್ ಬೂದಿ ಎರ್ಚಿಂದಂಗೈತಲ್ವೆನಾ...?!?

-ಮಯಾಸ

ಆಯ್ದ್ ಪೂಜೆ

ತ್ವಾಟ್ಗದ್ದೆಲಿ-ಹೊಲ್ದಲ್ಲಿ
ಚೇಮೆ ಮಾಡದ್
ಕಲಿಬೋಕಿತ್ಕನ..!

ಹಳ್ಳಿಲಿದ್ದಿದ್ರೆ
ಮನೆಲೊಂದ್

ಕೊಡ್ಲಿರೋದು..!

ಹೊಲ್ಗದ್ದೆ ಊಳಾದ್ ಕಲ್ತಿದ್ರೆ
ನೇಗ್ಲುನೊಗುಕ್ಕೆ-
ಪೂಜೆ ಮಾಡ್ಬೋದಿತ್ತಲ್ವೆನಾ..?

ಹಾರೆ-ಗುದ್ಲಿ
ಪಿಕಾಸಿ, ಮಚ್ಬಳ್ಸಂಗಿದ್ದಿದ್ರೆ
ನಾನೂನೆ ಆಯ್ದ್ ಪೂಜೆ
ಮಾಡ್ಬೋದಿತ್ತಲ್ವೆನಾ..??

-ಮಯಾಸ

ಯಪ್ಪಾ..ಯೋಟ್ ಉಪ್ಯೋಗಂತಿರಿ

ಯಪ್ಪಾ..ಯೋಟ್ ಉಪ್ಯೋಗಂತಿರಿ
ತೆಂಗಿನ್ ಮರ ಕಡ್ದು ನೀಟಾಗ್ ಸೀಳಿರೆ
ಮೇಲ್ಮನಿಗೆ ಪಕಾಸ್ ಆತ್ತದೆ...!

ಕಟ್ಟಿದ್ ಮನೆ ಗ್ವಾಡ್ ಕುಸಿದಂಗೆ
ಅಡ್ಡಾದಿಡ್ಡಿ ಹೊಡ್ಯೋ ಮಳೆರ್ಚ್ಲು ತಡ್ಯಕ್ಕೆ

ಬಿದ್ ಗರಿ ಒಟ್ಮಾಡ್ ಕಟ್ಟಿರೆ ನರ್ಕೆ ಆಯ್ತೊದೆ..!

ಹಿತ್ಲು-ಅಂಗ್ಳುದಲ್ ಚೆಲ್ಲಾಡಿದ್ ದರ್ಗ್ ಗುಡ್ಸಕ್ಕೆ
ವಣುಗ್ಲು ಗರಿ ಮದ್ಯದ್ ಕಡ್ಡಿ ಬುಡ್ಸಿ
ಒಟ್ಮಾಡಿ ಕಟ್ಟಿರೆ ಬರ್ಲುಕಡ್ಡಿ ಆಯ್ತದೆ..!

ಹಸ್ರು-ಕೆಂದ್ಗಾಯಿಲಿ ಯಳ್ನೀರ್ ಇರ್ತದೆ
ಸಿಪ್ಪೆ ಬುಡ್ಸಿ ಸುಲ್ದ್ ಇಟ್ರೆ ತೆಂಗಿನ್ಕಾಯ್ ಆಯ್ತದೆ
ಸಿಪ್ಸುಲಿದಂಗ್ ಹಂಗೆ ಮಡ್ಗಿರೆ ಕೊಬ್ರಾತ್ತದೆ...!

ಯಳ್ನೀರ್ ಮಟ್ಟೆ-ತೆಂಗಿನ್ಚಿಪ್ಪು
ಕಟ್ಕೆ ಇಲ್ದಾಗ ವಲಿಗ್ಬೇಕಾತದೆ
ಸುಟ್ ಕಪ್ಮಾಡಿದ್ ತೆಂಗಿನ್ ಚಿಪ್ಗೆ
ಉದ್ದುದ್ ಕಡ್ಡಿ ಚುಚ್ರೆ ಸೌಟ್ ಆಯ್ತದೆ..!

ಗುಡ್ಸಿರೆ ಬರ್ಲಾಗೋ ತೆಂಗಿನ್ಗರಿ ಕಡ್ಡಿ
ಗುಡಿಯೊಳ್ಗಿನ್ ಸ್ವಾಮಿಗೆ ಬೆಳ್ಗೋ
ಊದ್ಗಡ್ಡಿಲಿ ಉದ್ದುಕ್ಕಿರುತ್ತೆ-
ಉರ್ದುರ್ದಂಗೆ ಗಮ್ಗುಡುತ್ತೆ ಅಲ್ವೇನಾ...??

-ಮಯಾಸ

ಹಿಂದ್ ಮುಂದ್ ನೋಡ್ಲಿಲ್ಲ ಚಕ್ಬಂದಿ ನಟ್ಬುಟ್ಟೆ..!

ವಾರೆ ನೋಟುಕ್ ಮನ್ಸೋತೆ
ಹಾಲ್ಟಲ್ಲಿ ಠಿಕಾಣಿ ಹೂಡಾಕೆ
ಹಕ್ಪತ್ರ ಬೇಕಂದ್ಲು
ಸಾಗೋಳಿ ಚೀಟಿ ಬರ್ಕೊಟ್ಬುಟ್ಟೆ...!

ಊರಿಗ್ ಬಂದೋಳ್ 

ನೀರ್ಗೆ ಬರ್ದಿರ್ತಳ...?
ಪಿರೂತಿಯ ನರ್ಕೆಮನೆ ಆಸ್ಪಟ್ಲು
ಕಟ್ಕೊಬುಡತ್ಲಗೆ ಅಂದ್ಬುಟ್ಟೆ...!

ಅವ್ಳ ಮುಸಿಮುಸಿ ನಗೂಗೆ
ಮನ್ಸ್ಪೂರ್ಕಾಗಿ ಮರ್ಳಾಗಿ
ನಂಗೂ ನೆರ್ಳಾದಂಗಾತದೆ ಅನ್ಕಂಡು
ಮಂಜ್ರಾತಿ ಆದೇಸ ಕೊಟ್ಬುಟ್ಟೆ...!

ಅದೆಂಗಾತೋ ನಾಕಾಣೆ
ಎಂಡ್ ಮನ್ಸೂ ಕೂಡ್ಕಂಡ್ವು
ಹಿಂದ್ ಮುಂದ್ ನೋಡ್ಲಿಲ್ಲ
ಚಕ್ಬಂದಿ ನಟ್ಬುಟ್ಟೆ..!

ಸರ್ವೆ ನಂಬ್ರು ಸಿಕ್ಬುಟ್ತು
ಪಾಣಿ ತೆಗ್ದ್ಕೊಟ್ಬುಟ್ಟೆ
ಮತ್ಯಂತ ಮಾಡದು ಕನ
ಜಂಟಿಖಾತೆ ಮಾಡ್ಸ್ಬುಟ್ಟೆ !!!

-ಮಯಾಸ

ಇದ್ಕಿಂತ ಬ್ರೇಕಿಂಗ್ ನ್ಯೂಸ್ ಬೋಕೆನಾ...?!?

ಹಳ್ಳಿಜನುಕ್ಕೆ
ದಿಣ್ನೆ ಹತ್ತಿ-ದಿಣ್ಣೆ ಇಳ್ದ್ರೆ
ಏರುಸ್ರೂ-ಇಳುಸ್ರೂ ಬತ್ತದೆ
ದ್ಯಾನಪಾನ ಬೇಕಿಲ್ಲ..!

ವನ್ಕೆ ಎತ್ತಾಡಿ 

ವಳ್ಳುಕ್ಕಾಕಿ ಬತ್ತ ಕುಟ್ಟುದ್ರೆ
ಕಾಲಿಂದ ತಲಿತನ್ಕ
ವ್ಯಾಯಾಮಾತ್ತದೆ..!

ಕೊಡ್ಲಿ ತಗಂಡ್
ಮಣ್ಗಟ್ಲೆ ಸೌದೆ ವಡ್ದ್ರೆ
ಜಿಮ್ಮು ಪಮ್ಮು ಬೇಕಿಲ್ಲ
ಮೈಕೈ ಕಟ್ಮಸ್ತಾಗಿರ್ತದೆ ಕನ..!

ಮಳ್ಬತ್ತದ..? ಬೆಳೇನಾತದೆ
ಸಣ್ಣೊರ್ -ದೊಡ್ಡೋರ್ ಅಳ್ಯಕ್ಕೆ-
ತಿಳ್ಕಳಕ್ಕೆ, ಪ್ಯಾಪರ್ ವೋದ್ಬೇಕಿಲ್ಲ
ಮೂರ್ಖುರ್ ಪೆಟ್ಗೆ ನೋಡ್ಬೇಕಿಲ್ಲ ಕನ..!

ಹಳ್ಳಿಲಿ-ಡಿಲ್ಲಿಲೆನಾಯ್ತದೆ ಎಲ್ಲದ್ನು
ಊರ್ ಕಟ್ಟೆಲಿ ಹಿರಿಕ್ರು
ಕವ್ಡೆ ಬುಟ್ಟಂಗ್ ಹ್ಯೋಳ್ತಾರ್ಕನ..!
ಇದ್ಕಿಂತ ಬ್ರೇಕಿಂಗ್ ನ್ಯೂಸ್ ಬೋಕೆನಾ...?!?

-ಮಯಾಸ

ಹುಚ್ ಹುಚ್ಚಾಗ್ ಆಡ್ತಿದ್ ಅವ್ಳ್ನ ಹೆಂಗ್ ಹಚ್ಕಂಡ್ನೋ ತಿಳಿವಲ್ದು..!

ಮುತುಗುದ್ ಯಲೆಕಂಡಂಗಾತು
ಮುದ್ಮುದ್ದಾಗಿದ್ ಚಲ್ವಿ ಅವ್ಳು..!

ಹರ್ಳುರ್ದಂಗ್ ಮಾತಾಡೋಳು
ಚಿಲ್ಪಿಲಿ ಹಕ್ಕಿತರ ಕಿಲ್ಗುಡೋಳು..!


ಕಲ್ಬೀಸಿ ಹಾಲೆಹಣ್ ಕೆಡ್ವೋಳು
ನನ್ ಕಂಡ್ಗೂಡ್ಲೆ ಕಣ್ ಹ್ವಡ್ಯೋಳು..!

ಕಂಡೋರ್ ತ್ವಾಟುದ್ ಬ್ಯಾಲಿ ಹಾರಿ
ಬಾರಿ ಕ್ವಾಟ್ಲೆ ಮಾಡೋಳು...!

ನನ್ ಕಾಲ್ಗೆ ಮುಳ್ ಚುಚ್ರೆ
ಅಯ್ಯೋ ಅಂತ್ ನರ್ಳೋಳು...!

ಹುಚ್ ಹುಚ್ಚಾಗ್ ಆಡ್ತಿದ್ ಅವ್ಳ್ನ
ಹೆಂಗ್ ಹಚ್ಕಂಡ್ನೋ ತಿಳಿವಲ್ದು..!
-ಮಯಾಸ

ನಿಂತ್ರ ನಿಗ್ರಾಕ್ ಕಷ್ಟೇನಾ....? ಎದ್ರ ಎದಿಗ್ವದಿಯಕಕುಲ್ವೇನ...?

ತಳಕ್ ಬಳ್ಕಿಲ್ದೆ
ಕರ್ಗಿರ ನಾವ್..!
ಬಿಸ್ಲಲ್ಲಿ ಬೇಯ್ಕಂಡ್
ಬೆವುರ್ಸುರ್ಸಿ ದುಡ್ಯೋರ್ ಕನ..!

ಕಂಡೋರ್ ಕ್ವಟ್ಗೆ ಗುಡ್ಸಿ
ಗುಡ್ಮಾಡಿ ತಿಪ್ಕಾಕ್ವಾಗ
ಸಗ್ಣಿ ಜಂಡ್ ಬಟ್ಕಾರಿದ್ರೆ
ಮನ್ಸ್ ಕೊಳ್ಕಾಕಿರಲ್ಲ ಕನ..!

ಚೇಮೆ ಮಾಡ್ವಾಗ್
ಕೈಕಾಲ್ ಕೆಸ್ರಾತ್ತವೆ
ಇಸ್ತ್ರೀ ಮಾಡ್ದ್ ಬಟ್ಠಾಕಂಡ್
ಊರ್ಕೇರಿ ಅಲ್ಯಕತ್ತದೆನ...?

ಬರ್ಗಾಲ್ಲೆ ನಡ್ಯೋದು
ಪಟ್ಪಟ್ಟೆ ಚಡ್ಡೀನೆ ಹಾಕೋದು
ಹಬ್ಬುಕ್ಕೋ ಹುಣ್ಮಿಗೋ
ಬಿಳ್ಬಟ್ಟೆ ಉಡ್ತಿವಿ ಕನ..!

ಉಳ್ವಾಗ-ಹಡ್ಲೊಡ್ಯಾಗ
ಎತ್ ಗದ್ರುಸೋದ್ ಬಿಟ್ರಾ
ಎಗ್ರಾಡಿ ಪಗ್ರಾಡಿ
ನಿಗ್ರಾಡ್ ಗ್ವತ್ತಿಲ್ಲ ಕನ...!

ಹಂಗಂತ ಮಾನ್ ಮರ್ವಾದಿಗೆ
ನೀತ್ ನಿಯತ್ಗೆ ಅಂಜ್ ಬಾಳೋರ್ನ
ಹೀನಾಯ್ವಾಗ್ ಕಾಣ್ಬೇಡಿ ಕನ
ನಿಂತ್ರ ನಿಗ್ರಾಕ್ ಕಷ್ಟೇನಾ....?
ಎದ್ರ ಎದಿಗ್ವದಿಯಕಕುಲ್ವೇನ...?

ರೊಟ್ಟಿತಿಂದ್ , ಮುದ್ಮಿರ್ದ್ ಕೈರಟ್ಟೆ
ಗಟ್ಮುಟ್ಟಾಗವೆ..ಮರ್ತ್ಬುಡ್ಬೇಡಿ ಕನ..!?!
 -ಮಯಾಸ

ಮಂಕ್ರಿ ದಬ್ಬಾಕಿ ಹಾಲ್ಟಲ್ಲಿ ಕವ್ಚಾಕೀನಿ ಕನ...!

ಇದ್ಕಿದ್ದಂಗೆ
ಹಿಂಗ್ ನೋಡ್
ಹಂಗ್ ತಿರ್ಗೋದ್ರೊಳ್ಗ
ಕಿಸುಕ್ ಅಂದು-
ಮಯ್ವಾಗೋಗದ...???


ಬುಟ್ಟೆನ ನಾನು
ನನ್ ಮನ್ಸಿನಂತ್ ಊರ್ನಾಗ
ನೆನ್ಪಿನ್ ಸ್ಟೇಷನ್ಗೆ
ದೂರ್ ಕೊಟ್ಟೆ ಬುಟ್ಟೆ
ಸುಮ್ಕೂರ್ಲಿಲ್ಲ ಕನ...!!!


ಪಿರೂತಿ ಅನ್ನೋ ....
ಪೋಲಿಸುನ್ ಕೈಗೆ
ಸಿಗಾಕಬುಟ್ಲು ಕನ..!?!
ಮಂಕ್ರಿ ದಬ್ಬಾಕಿ
ಹಾಲ್ಟಲ್ಲಿ ಕವ್ಚಾಕೀನಿ ಕನ...!
 -ಮಯಾಸ

'ಕಾಡ್ಗೆ ಕಾಡೇ ಕ್ಯೊಂಪಾಗಕಿಲ್ವಾ'

ನನ್ನೂರ್ನ ಬೆಟ್ಟ ಗುಡ್ದಾಗ
ನನ್ ಅಜ್ಜುನ್ ಕಾಲ್ದಲ್ಲಿ
ಹುಲಿ,ಸಿಂವ ,ಆನ್ಕಾಟಂತೆ ಕನ..!

ಅಟಾಡ ವಯಸ್ನಾಗ ಅದೇ ಕಾಡೊಳ್ಗೆ
ರಂಬೆ ಕ್ವಂಬೆ ಹಿಡ್ಕಂದ್
ಜೋತಾಡ್, ಕುಣ್ದಾಡುದ್ ಗ್ಯಾಪಕೈತೆ ನಂಗೆ

ಕುಪ್ಳಿಸಿ ನಲಿದ ರಂಬೆಕೊಂಬೆಗಳ
ಕರೆಂಟ್ ನೆಪ್ದಲ್ಲಿ ಮೊನ್ಮೊನ್ನೆ
ಕತ್ರುಸಿ, ಹರಿಯ ನೀರ್ಗೆ ಕಟ್ಟೆ ಕಟ್ಟವ್ರೆ

ರಂಬೆಕ್ವಂಬಿಲ್ದದ ಅದೇ ಕಾಡ್ನಾಗ
ಕೊಂಬಿಂಗ್ ನಡಸವ್ರಂತೆ ಕನ
ಕೋವ್ಗೆ ಕೋವಿ ತೋರ್ಸ್ ಓಡುಸ್ತಾರಂತ್ ಕನ

ಚಿಕ್ಕುದ್ರಲ್ ನಾವಾಡ್ತಿದ್
ಕಳ್ಳ ಪೋಲಿಸ್ರಾಟ ನೆನ್ಪಾತು ಕನ
ಯುಲ್ಲಿ ಕಳ್ರಾರು ಪೋಲಿಸ್ರಾರಾ...?

ಇಬ್ರೂ ಕೈಲು ಕೋವ್ ಅದಾವೆ
ಇಬ್ರೂ ಕಾನೂನೆ ಮಾತಾಡ್ತಾರಂತಲ
ಹಸ್ರೆಲೆ ಮ್ಯಾಕೆ ರಕ್ತ ಚುಮ್ತದಾ..???

ಕಾಡ್ಗೆ ಕಾಡೇ ಕ್ಯೊಂಪಾಗಕಿಲ್ವಾ....?
ಇಬ್ರೂ ಕೋವಿ ಕೆಳ್ಗಿಟ್ರೆ-ಕಣ್ಬುಟ್ರೆ
ಯಂತ್ಯಂತ ಹೂ ಸಿಗ್ತಾವಲ್ವೇನಾ ಇಬ್ರೂ ಕೈಗೂ...?!?
 -ಮಯಾಸ

ಕಳ್ಗಂಟು ಮನ್ಲಿರ್ತಿರ್ಲಿಲ್ಲ..!

ಊರ್ಕಡೆ ಮನ್ಬಾಗ್ಲಿಗೆ

ಚಿಲುಕ್ವೆ ಇರ್ತಿರ್ಲಿಲ್ಲ ಅಲ್ಲೆನ..?


ಹಿತ್ಲಾ ಬಾಗ್ಲಿಗೊಂದ್

ವನ್ಕೆ ವತ್ಕೊಟ್ಟು

ಮುಂದ್ಲಾ ಬಾಗ್ಲಂಗೆ

ಮುಂದ್ಕೆಳ್ಕಂಡೋತಿದ್ವಿ...!


ಕಳ್ರು ಪಳ್ರು ಕಾಟಿರ್ಲಿಲ್ಲ

ಕಳ್ಗಂಟು ಮನ್ಲಿರ್ತಿರ್ಲಿಲ್ಲ..!


ಮನ್ಸುತ್ತಾ ಮಿಲುಟ್ರಿ ಪಡೆ

ಹೊಸೆಜ್ಜೆ ಕಂಡ್ರೆ

ವಿಚಿತ್ರವಾಗ್ ಹಕ್ಕಿ ಕಿಂಯ್ ಗುಡಾವು

ನಾಯ್ ಬೊಗಳಾಕ್ ಹತ್ತೋವು ಕನ..!


ಅದ್ಯಾಕ ಇತ್ತಿತ್ಲಾಗೆ...

ಮನುಸ್ರುಗೆ ಮನುಸ್ರು ಕಂಡ್ರಾತ್ತಿಲ್ಲ...!


ನಗಾಡಕೆ ಬರ್ದಿರ

ಜನ್ಕೆ -

ಅಳ್ದೂ ತೂಗಿ ಮಾತಾಡ

ಮಂದ್ಗೆ-

ಯೋನೇಳನಾ...ಕನಾ...!?!
  -ಮಯಾಸ

ನೀರ್ಬರೋ ಕಣ್ನಾಗ್ ರಕ್ತ್ ಚುಮ್ತದೆ...!

ಯಬ್ಬಾ... ಯಬ್ಬಾ... ಯಬ್ಬಾ...
ಯೋಟ್ ಗಟ್ಮುಟ್ಟಾಗವೆ ಯಂತಿರಿ..?

ಆಲ್ದ್ ಮರುದ್ ಬೇರ್ ಬಿಟ್ಟಂಗ್ ಬಿಟ್ಯಾವೆ
ಕಿತ್ತೋದ್ ನೆನ್ಪ್ಗಳು..!


ಮಗ್ಲೇ ಬದ್ಲಾಯ್ಸಾಕಿಲ್ಲಂತವೆ
ಬರ್ಸಿಡ್ಲು ಹೊಡ್ದಂಗೆ-
ಇದ್ಕಿಂದಂಗ್ ರಪ್ಪಂತ್ ಹ್ವಳ್ತಾವೆ..!

ಯವ್ವಿ..ಯವ್ವಿ..ಯವ್ವಿ...
ಮರುಕ್ ಹತ್ತಿದ್ ಬೀಳ್ ಕಿತ್ತಾಕ್ಕ್ಬೋದ್..!

ಮನ್ಸಿಗ್ ಅಂಟಿದ್ ನೆನ್ಪು ಕೀಳಾಕಾಕುಲ್ಲ
ಬೆನ್ಗೆ ಅಂಟಿದ್ ಬ್ಯಾತಾಳ್ದಂಗ್ ಕಾಡ್ತದೆ..!

ಮರ್ಯಕ್ಕೂ ಅಕ್ಕುಲ್ಲ
ನೆನ್ಪಾದ್ರೆ ನೋವಾತ್ತದೆ

ಕಳ್ಕಂಡದ್ ಹುಡ್ಕಂಡ್ ಹೊಂಟ್ರೆ
ಜಲ್ ಬತ್ತೋದ್ ಬಾವಿಲ್ ನೀರ್ ಕಂಡಂಗಾತದೆ..!!

ನೀರ್ಬರೋ ಕಣ್ನಾಗ್
ರಕ್ತ್ ಚುಮ್ತದೆ...!

ಗುಂಡ್ಕಲ್ಲಂಗಿದ್
ಗುಂಡ್ಗೆ ಬಡ್ತ್ ಅಡುಗ್ತದೆ ಕನ...!!!
  -ಮಯಾಸ

ದಿಕ್ ಹುಡ್ಕಿರೆ ಹೆಂಗ್ ಕಾಣ್ತದ..?

ಮಂಜ್ ಕವ್ಕಂಡ್ರೆ
ದಿಕ್ಕೇ ತೋಚ್ತಾ ಇರ್ಲಿಲ್ಲಕನ
ಮನ್ಸಿಗೆ ಮಂಕ್ ಬೂದಿ ಎರ್ಚ್ ಕಂಡು
ದಿಕ್ ಹುಡ್ಕಿರೆ ಹೆಂಗ್ ಕಾಣ್ತದ..?!?


ಹ್ವಳಿಗಾಕಿರೂ ಅಳ್ದಾಕು ಅನ್ನೋರು
ಈಗ್ನೂ ಅಳಿತ್ತಾರ್ ಕನ
ಆದ್ರಾ...
ಹ್ವಳಿಗಾಕಾಕೆ ಮನ್ಸೇ ಬರಾಕಿಲ್ಲಂತೆ ಕನ

ನಾಯ್ಗೆ ಹಾಕೋದ್ನ ನಂಗಾಕು
ಕೊತ್ತಿಗಾಕೋದ್ನ ಕುತ್ಗೆಗಾಕು ಅಂತಾರ್ಕನ
ಇಸ್ಕಳಕ್ಕೆ ಎಲ್ರೂಗೂ ಈಟ್ ಉದ್ದ ಕೈ
ಕೊಡಾಕ್ ಮಾತ್ರ ಕೈ ಗುಡ್ಡ ಕನ

ನೆನ್ ಆಡಿದ್ ಮಾತ್ಗೆ ಇವತ್ ಬೆಲಿಲ್ಲ ಕನ
ಮುಯ್ಯಾಳ್ ಮಾಡ್ಕಂಡ್ ನೆಚ್ಕಂಡಿದ್ವಲ್ಲೋ
ಈಗಂಗಿಲ್ಲ ಕನ...ನೊಚ್ಚುಗೆ ಮಾತಾಡ್ತಾರೆ
ಎಲುಬಿಲ್ಲುದ್ ನಾಲ್ಗೆ ಎತ್ತಕ್ ಬೇಕಾರ್ ಹೊರುಳ್ತೆ ಕನ

ಕಾಸ್ ಮುಂಚಿಡು
ಚೇಮೆ ಆಮ್ಯಾಕೆ ಅಂತಾರ್ ಕನ
ಒಂದ್ ಸೇರ್ ಅಕ್ಕಿಗೆ ಎಂಡ್ ಸೇರ್ ರಾಗಿಟ್
ಕೊಡ್ತಿದ್ ಕಾಲ ಎಲ್ಲೋತಾ...????

-ಮಯಾಸ

'ನೆಮ್ದ್ ಇಲ್ಲ'

-----ಅವಾಗ್ಲೆಲ್ಲ--- 
ನರ್ಕೆ ಮನಾದ್ರೂ ಸೈ
ಅರ್ತ್ ಬಾಳ್ಬೇಕು
ಅಂತನ್ನೋರು ನುರ್ತೋರು..!

ನುಚ್ಚನ್ನ ತಿನ್ನೋಕು
ಹಿಂಜರಿತಿರ್ಲಿಲ್ಲ ಕನ
ನೆಚ್ಕಂಡ್ ಬಂದವ್ರು..!

-----ಈಗ್ ನೋಡ್ರೆ---

ಮೆಚ್ಕಂಡ್ ಮದ್ವಾತರೆ
ವರ್ಷ ತುಂಬಂಗಿಲ್ಲ
ಕಚ್ಚಾಡ್ಕಂಡ್ ದೂರಾತಾರೆ..!

ದಿನ್ವಿಡೀ ದುಡಿತರೆ
ಹೊಟ್ತುಂಬ ತಿನ್ನಕ್ಕಿಲ್ಲ
ಮೈ ತುಂಬ ತ್ವಡಾಕಿಲ್ಲ....!

ಯೋನ್ ಇಲ್ದಿದ್ರೂ ಅವಾಗ್ ನೆಮ್ದಿತ್ತು ಕನ
ಈಗ್ ನೋಡ್ರೆ ನಂಬ್ಕೂ ಇಲ್ಲ ನೆಮ್ದೂ ಇಲ್ಲ ಅಲ್ವೇನಾ..?!?

-ಮಯಾಸ

ಅಂತ್ರ

ಚಂದ್ರುನು
ಸೂರ್ಯೂನು
ಆಕಾಶ
ಹಂಚ್ಕಂಡವ್ರೆ ಕನ


ಅದ್ಕೆ
ಬೂಮ್ಗೆ
ಮುನ್ಸಂತೆ ಕನ
ಅಂತ್ರ
ಕಾಪಾಡ್ಕಂಡೈತಂತೆ...!

-ಮಯಾಸ

ಸೌದೆ ವಲೆ ಸ್ನಾನದ ಮಜಾನೆ ಬ್ಯಾರೆ

ಸೌದೆ ವಲೆಲಿ ನೀರ್ ಕಾಸ್ಕಂಡ್

ಹಂಡೆ ನೀರ್ಸಾನ ಮಾಡೋ ಮಜಾ

ಗೀಜರ್ರೂ-ವಾಟ್ರು ಹೀಟ್ರೂ ಕಾಯ್ಲಲ್ಲಿ ಇಲ್ಲ ಕನ..!

ಬೇಲಿ ಅಂಡೆ ಪುಳ್ಳೆ ಮುರ್ದು-

ನೀರೊಲಿಗಿಟ್ಟು...ಕೊಳ್ಪೆತಗಂಡ್ ಉಪ್ ಅಂದ್ರೆ

ದಗ್ಗಂತ ಬೆಂಕಿ ಹೊತ್ತುರಿಯೋದು ಕನ..!

ಬೆಳ್ಗಾನ ಎದ್ ನೀರ್ವಲೆ ಮುಂದ್ ಕೂತು

ಮೈ ಕೈ ಕಾಯ್ಸ್ ಕಂಡ್ -

ಬರ್ಕಾಪಿ ಹಿಗ್ತಿದ್ ಮಜಾನೆ ಬ್ಯಾರೆ ಕನ..! 

ಈಗ್ಯಲ್ಲಾ ಸೋಪಾಕ್ ನೀರ್ ಹೂಕಂಡ್ರೆ 

ಸಾನ ಮುಗೀತ್ ಕನ-

ಬೈನೇಬೀಳ್ ಕತ್ತಾ ತಗಂಡ್ ಉಜ್ಕಾಬೇಕಿತ್ತು ಕನ..!

ಇದ್ಲು ತಗಂಡ್ ಹಲ್ಲುಜ್ಜೋವಿ

ಹಲ್ ನೋವಾದ್ರೆ ಉಪ್ಪಲ್ಲಿ ತಿಕ್ಕಳವಿ 

ಬ್ಯಾವಿನ್ ಕಡ್ಡಿ - ಕಳ್ಳಿ ಕಡ್ಡಿ ಸಿಕ್ರೆ ಅದ್ರಲ್ಲೇ ತಿಕ್ಖಳ್ಳವಿ..!

ಸೌದೂ ಇಲ್ಲ , ವಲೂ ಇಲ್ಲ, ಕೊಳ್ಪೂ ಇಲ್ಲ

ಹಾಲಿಲ್ದ್ ಕಾಪಿ ಕುಡ್ಯಾಕ್ ಅಕ್ಕುಲ್ಲ

ಕಳ್ಳಿ ಬಡ್ಡೆ ಕಾಣಾಕಿಲ್ಲ..ಯಾಕೋ ಎಲ್ ನೆನಪಾತು ಕನ

ಕಾಲ್ ಬದ್ಲಾತೋ.....?

ನಾ ಬದ್ಲಾದ್ನೋ ಕಾಣೆ..!!!

-ಮಯಾಸ

ಮನ್ಯೊಳ್ಗಿನ್ ಗುಟ್ಟು ಹೊಸುಕ್ಲೂ ದಾಟ್ತಿರ್ಲಿಲ್ಲ

ನನ್ನಜ್ಜ..ಚಿಕಪ್ಪ..ದೊಡಪ್ಪ..
ನಮ್ಮಯ್ಯ ..ನಮ್ಮಾವ
ಗುಂಡ್ಕಲ್ಲಂಗೆ ಗಟ್ಮುಟ್ಟಾಗಿದ್ರೂ
ರಟ್ಟೆ ಮೇಲ್ ದೈರ್ಯಾ
ಬೆವ್ತೂ ದುಡ್ದ್ರೆ ಹೊಟ್ಟಿಗ್ಮೋಸಿಲ್ಲ
ಹಬ್ಬ ಹುಣ್ಮೆ ಹೋವೆತ್ತಿಟ್ಟಂಗೆ
ಅಂತಂದ್ ಇಳುಸ್ರೂ ಬುಡೋರು..!

ನನ್ನಜ್ಜಿ..ಚಿಕವ್ವ..ದೊಡವ್ವ
ನಮ್ಮವ್ವ..ನನ್ ಅತ್ತೆ
ಕೋಳ್ ಕೂಗೋ ಮುಂಚೆದ್ದು
ಕೊರೆಯೋ ಚ್ವಳಿಲೆ ಹಟ್ಟಿಗುಡ್ಸಿ
ಮನೆ ಮುಂದುಕ್ಕೆ ರಂಗ್ವಾಲೆ ಬುಟ್ಟು
ಕೊಟ್ಗೆಗುಡ್ಸಿ ತಿಪ್ಪೆ ಗುಡ್ಮಾಡಿ
ಮುಕ ತೊಕ್ಕಂದ್ ವಲೆಮುಂದ್ಕೂರೋರು..!

ಉಣ್ಣಕಿಕ್ವಾಗ ಬಳೆ ಜಲ್ಗುಡದಿದ್ರ
ಹಣೆಮ್ಯಾಗಿನ ಕುಂಮ್ಕುಮ ಅಳ್ಸೋಗಿದ್ರೆ
ಕತ್ತಲ್ ತಾಳಿ ಕಾಣ್ದಿದ್ರೆ
ಮನೆ ಹೊಸುಗ್ಲು ದಾಟಿದ್ ಕೂಡ್ನೆ
ಚಿಲ್ಕಾ ತೆಗೆಯೋಕ್ ತಡಾದ್ರೂ-
ಕಾಲ್ ತೊಳ್ಯಾಕ್ ಚೊಂಬ್ ನೀರ್ ಇಲ್ಲಂದ್ರೆ
ಹೆಂಡ್ರು ಕಪಾಳುಕ್ಕೆ ಗಂಡ್ರ ಪೆಟ್ಟಿತ್ತು..!

ಮಾನ ಮರ್ವಾದೆಗೆ ಅಂಜೋರು
ನೀತ್ ನಿಯತ್ಗೆ ಬಗ್ ನಡ್ಯೋರು
ತಳುಕ್ ಬಳುಕ್ ಇರ್ಲಿಲ್ಲ ಕನ
ಮನೆ-ಮನ್ಸು ತುಂಬ್ ತುಳುಕೋವು
ಒಂದ್ ಮನ್ಯಾಗ ಉಪ್ಮೀನ್ ಸುಟ್ರೆ
ಊರೆಲ್ಲಾ ಗಮ್ಗುಡೋದು ಕನ
ಈಟಾದ್ರೂನು-

ಒಂದ್ ಮನ್ಯೊಳ್ಗಿನ್ ಗುಟ್ಟು ಹೊಸುಕ್ಲೂ ದಾಟ್ತಿರ್ಲಿಲ್ಲ
ಬದುಕ್ನ ಬಂದಂಗೆ ತೂಗಿಸ್ಕಂಡ್ ಹೆಂಗೋಗಾರು ಅಲ್ವೇನಾ...?!?


-ಮಯಾಸ

 

ಊರ್ಕಡಿಕೆ ಪಾದ

ಬರ್ರಂಥ ಗಾಳಿ ಬೀಸ್ತಾ ಇರ್ಬೇಕು
ಉಂಡೆ ಮ್ಯಾಲ್ ಉಂಡೆ ಕರ್ಚಾದ್ರೂ ಚಿಂತಿಲ್ಲ
ಗ್ವಾತ ಹೊಡಿದಂಗ್ ಗಾಳಿಲ್ ಪಟ ಹಾರ್ಸ್ಬೇಕ್ ಕನ

ಉಡ್ದಾರ ಸುತ್ ಕಂಡು
ನೆಲುದ್ ಮ್ಯಾಲೆ ಗಿರುಗುಡೋ
ಬುಗ್ರಿ ನೆತ್ತಿ ಮ್ಯಾಕೊಂದು ಗುನ್ನ ಹಾಕ್ಬೇಕ್ ಕನ

ಮಳ್ಬಂದ್ ಹೋದ್ ಮೇಲೆ
ಗ್ವಾಡೆ ಅಡೆಲಿ ಮೂರ್ ಗುಂಡಿ ತೋಡಿ
ಹಿಂತ ಮುಂತ ಆಡಬೇಕನ್ಸೈತೆ ಕನ

ಬಾರೆಮ್ಯಾಲೆ ಕೋಲಿಡ್ಕಂಡ್ ಕಲ್ಮುಟ್ಸಾಟ ಆಡಬೇಕು
ಆಲುದ್ ಮರುದ್ ಬೀಳ್ಗೆ ಜೊಕಂಡ್ ತೂಗಾಡ್ಬೇಕು
ಲಕ್ಕೆ ಸೊಪ್ಪಿನ್ ಬೊಂತೆ ಮಾಡ್ಕಂಡ್ ಬಡಿದಾಡ್ಬೇಕು ಕನ

ಬೇರಿಂಗ್ ಚಕ್ರ ಸಿಗದಿದ್ರೆ
ರಾಕ್ಷಿನ್ ಪಟ್ಟೆ ಮುರ್ಕೊಂ ಬಂದ್
ಇಳ್ಜಾರಲ್ಲೊಮ್ಮೆ ಜಾರೋಗ್ಬೇಕು ಕನ

ಗೌರಮ್ ಬ್ಯಾರೆ ಬತ್ತವ್ಳೆ
ದೊರ್ದಲಿಟ್ ಕಾಯಿಗೆ
ಕಲ್ಲಿಂದ ಬೀಸೊಡಿಬೇಕು ಕನ

ಬೆಂಗ್ಲೂರು ಬೋರಾಗೋತು
ವಾರ್ಕಳ್ದು ವಾರ್ಮುಗಿಯೋದ್ರೊಳ್ಗ
ಊರ್ಕಡಿಕೆ ಪಾದ ಬೆಳ್ಸದೆ ಕನ

-ಮಯಾಸ

ನನ್ನಜ್ಜಿ

ಸುಕ್ಕು ಮುಖದ ನನ್ನಜ್ಜಿ
ಗಡಿಯಾರಪಡಿಯಾರ ನೋಡ್ತಿರ್ಲಿಲ್ಲ
ನೆರಳ್ ನೋಡ್ಕಂಡೇ
ಗಂಟೆ ಹೇಳೋದು....!

ಕಾಲಿಗ್ ಬೂದಿ ತಿಕ್ಕಂಡೇ
ತ್ವಾಟ-ಗದ್ದೆ ಅಲ್ಯೋದು
ಕಾಲಿಗ್ ಜಿಗ್ಣೆ ಕಚ್ರೆ
ಸುಣ್ ತಿಕ್ಕಳ್ಳಿ ಅಂತನ್ನದು..!

ಸುಸ್ತಾಗಿ ಬೆವುತ್ಕಂಡ್ರೆ
ಅರ್ಸುಣುದ್ ನೀರ್ ಮಾಡಿ ಚೆಲ್ಲಾದು
ಮದ್ವೆ-ಮುಂಜಿಗೋಗ್ ಬಂದ್ರೆ
ಉರಿಯೋ ಕೆಂಡಕ್ಕೆ ಬರ್ಲುಕಡ್ಡಿ ನೀವುಳ್ಸೀ
ದೃಷ್ಟಿ ತೆಗ್ದಾಕೋದು...!

-ಮಯಾಸ

ಯಾಕಿಂಗ್ ಆಗ್ಬುಟ್ವೋ ಮನುಷ್ರೂ...?!?

ಮುಂಚ್ಮುಂಚೆ...
ಬರ್ ಚಾಪೆ ಮ್ಯಾಲ್ ಕುಂತು
ಚಕ್ಕಳಬಕ್ಕಳ ಹಾಕಂಡ್
ತಟ್ ತುಂಬ ಉಂಡ್ರೆ
ತೇಗ್ ಬತ್ತಿತ್ತು...!

ಇತ್ತಿತ್ಲಾಗೆ..
ಕಾಲ್ ಮಡ್ಚಿ ಉಂಡೇಳಾದ್ರೊಳ್ಗೆ
ಕಾಲ್ ಮರ್ಗಟ್ತಾವೆ
ತಟ್ ತುಂಬ ಉಣ್ಣಾಕಾಕುಲ್ಲ
ವಾಂತ್ ಬಂದಂಗ್ ಆತ್ತದೆ ಕನ...!

ಅದ್ಯಾಕೋ ಗೊತ್ತಿಲ್ಲ...
ಹೊಟ್ ತುಂಬಾ ಉಣ್ಣಾಕಾಕುಲ್ಲ
ಕಣ್ ತುಂಬ ನಿದ್ ಬರಾಕಿಲ್ಲ
ಎದ್ರೆ ಕೂರಾಕಾಕಿಲ್ಲ
ಕುಂತ್ರೆ ಏಳಾಕಾಕಿಲ್ಲ...!

ಮನ್ಸಿನ್ ಬಾದೆ ದೇಹುಗೊತ್ತಾಗಕಿಲ್ಲ
ದೇಹುದ್ ಮಾತ್ ಮನ್ಸ್ ತಿಳಿವಲ್ದೂ
ಯಾಕಿಂಗ್ ಆಗ್ಬುಟ್ವೋ ಮನುಷ್ರೂ...?!?

-ಮಯಾಸ

ಅಣ್ಬೆ

ಮಳೆ ಜ್ವತಿಗೆ ಗಾಳಿ ಬಂದ್ರೆ
ಅಣ್ಬೆ ಏಳ್ತಾವೆ...!

ಬಿಸಿಲು ಮಳೆ ಒಟ್ಟಿಗ್ ಹೂದ್ರೆ
ಬಿಲ್ದೊಳ್ಗಿನ್ ಹಾವು ಈಚಿಗ್ ಬತ್ತಾದೆ..!

ಸಿಡ್ಲು ಜ್ವತಿಗೆ ಗುಡುಗ್ ಬಂದ್ರೆ
ಹಾಲೇಡಿ ಗದ್ದೆ ಬದೀಗೆ ಬತ್ತವೆ..!

ಬಿಸಿಲ್ ಮುಗ್ದು ಟಿಸಿಲ್ ಹೊಡ್ದ್ರೆ
ಬಿದ್ರು ಮಣ್ಕೆಲಿ ಕಳ್ಲೆ ಸಿಗ್ತಾವೆ..!

ಇಟ್ಗೆ ಗುಂಡಿಗೆ ನೀರ್ ತುಂಬ್ಸಿ
ಹೊಳಿಳ್ದ್ರೆ- ಮಳ್ಳಿ ಮೀನ್ ಸಿಗ್ತಾವೆ..!

ಅಬ್ಬಾ..! ಮಲ್ನಾಡೊಳ್ಗೆ
ಎಲ್ಲಾ ಐತೆ...ನಾನಿಲ್ಲ ಕನ..!?!
-ಮಯಾಸ

ಹುಡುಗ್ತೀವ್ನಿ ಎಲ್ಲೆಲ್ಲೂ ಕಾಣವ್ಲೂ...!!!

ಬಾಲದಾವ್ರೆ ಹೂವ್ ಮುಡ್ಕಂಡ್
ಬಳುಕಂಡ್ ನಡಿಯೋಳು

ಚೆಂಡೂವ ಮುಡಿಕಂಡ್ರೆ
ಚಂದ್ರೂನಂಗ್ ಹೊಳಿಯೋಳು

ದುಂಡ್ ಮಲ್ಗೆ ಮುಡಿಕಂಡು
ಮಳ್ಳಿಯಂಗ್ ಇರೋಳು

ಜಾಜಿ ಹೂ ಕುಯ್ತಾನೆ
ಕಿಸ್ಗುಡ್ಕಂಡ್ ನಗೋಳು

ಉದ್ದೀತೊಟ್ಟೀನ್ ಹೂ ಹಿಡಿಕಂಡ್
ಊರೆಲ್ಲಾ ಅಲ್ಯೋಳು

ಬೆಟ್ಟದ್ ಕಣಗಲ್ ಹೂ ಬಾಚ್ಕಂಡ್
ಬಾರೆಮೇಲ್ ಕೂರೋಳು

ದಾಸವಾಳದ ಹೂವ್ ಸಿಕ್ರೆ
ದಾನಪಾನ ಮಾಡೋಳು

ಕನುಕಾಂಬ್ರಾ ಹೂ ಕಂಡ್ರೆ
ಕಣ್ ಕಣ್ ಬಿಡೋಳು

ಸೇವಂತ್ಗೆ ಹೂ ಸಿಗ್ತೋ
ಸ್ವಾಮಿಗ್ ಮಾಲೆ ಪೋಣ್ಸೋಳು

ಸಂತೆಪಂತೆ ಜಾತ್ರೆಗೋಗೋವಾಗ
ಮಾರುದ್ದ ಹೂ ಮುಡಿಯೋಳು

ಚೀಟಿ ಹೂ ಹೆರ್ಕೋವಾಗ
ಸೀಟಿ ಹೊಡ್ಕಂಡ್ ಪದ ಬುಡೋಳು

ಇಂತುಡ್ಗೀ ಹುಡುಗ್ತೀವ್ನಿ
ಎಲ್ಲೆಲ್ಲೂ ಕಾಣವ್ಲೂ...!!!
-ಮಯಾಸ

ಶಿಕಾರಿ ಜಮಾನ ಕನ.

ಅಯ್ಯಯ್ಯಯ್ಯಾ....
ಯಾಕಿಂಗ್ ಬೊಗಳಾಕ್ ಹಥೈತೋ ನಾಕಾಣೆ
ತಿರಗಾ ಅಂದ್ರೂ ತಿರುಗ್ವಲ್ದೂ-
ಕಾಡೊಳ್ಗೆ ಯಾವ್ದೋ ಪಿರಾಣಿ...
ಗೀಗುಡ್ತೈತೆ ಅನ್ಸುತ್ತೆ
ಹಣಿಗೊಂದ್ ಟಾರ್ಚ್ ಕಟ್ಕಂಡ್
ಹೆಗಲ್ ಮ್ಯಾಕೆ ಕೋವಿ ನ್ಯಾತಾಕಂದು
ಬರಬರಾ ನಡುದ್ರೆ-
ನಡೆದ್ ದಾರಿಗೆ ಮೋಸಿಲ್ಲ
ಡಬ್ಬಂತ ಸವುಂಡು ಬಂತೋ
ಕೋವಿ ಅದೃಷ್ಟ ಖುಲಾಯಿಸ್ದಂಗೆಯಾ...
ಬೊಗಳಿದ್ಕೂ ಭಾಡೆ
ನಮುಗೂ ಬಾಡೆ
ಹಂಗಿತ್ತು ಶಿಕಾರಿ ಜಮಾನ ಕನ....!
-ಮಯಾಸ

ಮಾತಾಡುದ್ರೆ ಮುತ್ ಉದ್ರೋತ್ತಾವೆ

ಮುಂಚಿಂದನೂ
ಹಿಂಗೆಯಾ
ಮಾತೇ ಆಡಕಿಲ್ಲ ಕನ ಇವ್ಳೂ
ಮಾತ್ ಬಾರುದ್ ಮೂಗೇನಲ್ಲ
ಮಾತ್ ಬತ್ತಾವೆ..!
ಆದ್ರೂ ಮಾತಾಡಕಿಲ್ಲ.

ಮಾತಾಡುದ್ರೆ ಮುತ್ ಉದ್ರೋತ್ತಾವೆ
ಅನ್ನಂಡವ್ಳೆ ಕನ-
ಅದ್ಯಾಕಿಂಗ್ ಸುಮ್ಕಿದ್ದೀ..?
ಮಾತಾಡ್ಗೀ ಅಂದೆ ಕನ
ಅರಚಾಡ್ದೆ ಕನ-
ಕನಸ್ನಾಗ ಮಾತಾಡಿರಾ
ಇಬ್ರೂಗೂ ಕೆಳ್ಸಾಕಿಲ್ಲ ಕನ
-ಮಯಾಸ

ಹಾವ್ನಾ ಕೆಣಕ್ಬಾರ್ದು ಕನ

ಮಲ್ಕಂಡ್
ಹಾವ್ನಾ
ಕೆಣಕ್ಬಾರ್ದು ಕನ
ಸುಮ್ಕಿದ್ ಹಾವ್ಗೆ
ರೇಗತ್ತಿರೆ ಕಷ್ಟ ಕನ
ತಾಕತೈತಂಥ
ಬಂಡಿಗೆ -
ಮಂಡೆ ಚಚ್ಕೋಬ್ಯಾಡ ಕನ
ಮೊನ್ಮೊನ್ನೆ ಮೇಂದಿ
ಹಚ್ಕಂಡ್ ಕೈಗೆ ತುರ್ಕೆ ಬಂದವೆ
ಹಾಲ್ ಕುಡುದ್ರೇ-
ಕೆಲವ್ರಿಗೆ ಅಲರ್ಜಿ ಆತ್ತದೆ
ವಿಸ ಕಾರೋ ಹಾವ್
ಸುಮ್ನೆ ಮಲಗೈತೆ
ಅದರ್ ತಂಟಿಗೆ ಹೋಗ್ ಬ್ಯಾಡ ಕನ....!!!
-ಮಯಾಸ

ಪಡ್ಕಾಬ್ಯಾಕಾ...? ಬುಟ್ಬುಡ್ಬ್ಯಾಕಾ..?

ಬಯಸಿದ್ನ
ಪಡ್ಕಾಬ್ಯಾಕಾ...?
ಬುಟ್ಬುಡ್ಬ್ಯಾಕಾ..?
ಪಡ್ಕಂಡ್ರೆ ಹೆಂಗ್ ಸಂಬಾಳ್ಸೋದು..?
ಬುಟ್ಬುಟ್ರೆ ಹೆಂಗ್ ತಡ್ಕಳ್ಳೋದು..?
ಇಂತವ್ ನೂರ್ ಪ್ರಶ್ನೆ ಮೂಡ್ತವೆ ಕನ
ಯೋನ್ ಮಾಡ್ಲಿ..???
ಉತ್ರುವೇ ಸಿಗಬಾರ್ದು ಅನ್ಕಂಡೀವ್ನಿ ಕನ...!!!
-ಮಯಾಸ

ಪಿರೂತಿ ಕಳ್ಕಂಡ್ ಬೆಳಕಂಡ್

1-
ಹ್ಹೇ...ಬುಡತ್ಲೆಗೆ
ಯಾವ್ಯಾವೋ ಕನಸ್ಗಳು
ಯಾರ್ಯಾರ್ದೋ ನೆನ್ಪ್ಗಳು
ಇದ್ಕಿದಂಗೆ
ಮಗ್ಲು ಬದಲಾಯ್ಸಿದಂಗಾತದೆ
ಯಕ್ಕಡಿಕ್ ಹೊರಳಕ್ಕೂ ಹಿಂಸೆ ಕನ
ಹೊಕ್ಕಳಬಳ್ಳಿ
ಕತ್ರಿಸಿದಂಗಾತದೆ
- ಮಯಾಸ

-2-
ಕಳ್ಕಂಡ್ ಪಿರೂತಿ
ಕಾರೆ ಮುಳ್ಳಂಗೆ
ಚುಚ್ಚುತ್ತೆ-
ಬೆಳಕಂಡ್ ಪಿರೂತಿ
ಮುಟ್ರೆ ಮುನಿಯನಂಗೆ
ಮುಟ್ಟಿದ್ರೆ ಮುದುಡ್ಕಳುತ್ತೆ
ಅದ್ರಷ್ಟುಕ್ಕದೆ ತೆರ್ಕಳುತ್ತೆ
-ಮಯಾಸ

ಕಂಕ್ಳು

ಕೊರ್ಯೋ
ಚಳಿಲೂ ನೀ-
ಕೊಡಪಾನ ತಕ್ಕಂಡು
ಬಾವಿಗೋಗ್ವಾಗ...
ನೋಡ್ಕಂಡ್ ಬೆವುತ್ಕಂಡ್
ಬೆಪ್ತಕ್ಡಿ ಆಗ್ತಿದ್ದೆ-
ಅದೇ ಕಣ್ನಾಗ
ಕಂಕ್ಳಲ್ಲಿ
ಮಗಾ ಎತ್ಕಂಡು
ಗಂಡುನ್ಜೊತೆ
ಹೋಗೋದ್ಕಂಡು
ಬೆಪ್ಪರ ಬೆರ್ಗಾದೆ..!?!
-ಮಯಾಸ

ಕಾಲ್ಗೆಜ್ಜೆ ಸಪ್ಳ

ಮರ್ತಂಗೆ
ಇದ್ರೂ ನಂಗೆ
ಮೆಲ್ಲುಗೆ
ನೀ-ನಡ್ಕಂಡ್ ಹೋಗ್ವಾಗ
ಬತ್ತಾ ಇತ್ತಲ್ಲ...
ಕಾಲ್ಗೆಜ್ಜೆ ಸದ್ದು ( ಸಪ್ಳ)
ಆದಿವಾಗ್ಲೂ
ಕಿವಿಲಿ ಗುಯ್ ಗುಡ್ತದೆ ಕನ..!
-ಮಯಾಸ

ನಾಯಿ ಬಾಲ

ಕಟ್ಕಂಡ್ ಗಂಡುನ್
ಬುಡೋಕ್ ತಯಾರಿವ್ನಿ
ಕಲ್ತ್ ಬುದ್ದಿ ಬುಡಕಿಲ್ಲ
ಅಂತೀಯಲ್ಲೋ ಮಾರಾಗಿತ್ತಿ
ನಿನ್ ಮತಿಗೆಟ್ ಬುದ್ದಿಗೆ
ನಾನೇನ್ ಹೇಳ್ಲಿ ಬುಡತ್ಲೆಗೆ
ನಾಯಿ ಬಾಲುಕ್ಕೆ
ದಬ್ಬೆ ಕಟ್ರೆ ಸರೋತ್ತದಾ..?!?
-ಮಯಾಸ

ಜೀವ ಕುಸ್ದ್ ಹೋತ್ತದೆ ಕನ

ಕೈಲಿದ್ದಿದ್ನ
ಕಳಕಂಡ್ರೂ
ನೋವಾಗಕಿಲ್ಲ...
ಕಾಲ್ ಜಾರ್ಬುಟ್ಟು
ಪೆಟ್ಟಾದ್ರೂ ..ತಡ್ಕಾಬೊದು ಕನ
ಒಂದ್ ಮಾತ್ ಹೇಳ್ತೀನಿ ಕೇಳ್ಕಾ
ಈ ಹಾಲ್ಟೈತಲ್ಲಾ ಅಲ್ಲಿಂದ
ನೀ ವಸಿ ಜಾರಿದ್ರೂ
ಕರುಳ್ಮಿಳ್ ಅಂತದೆ ಕನ
ಜೀವ ಕುಸ್ದ್ ಹೋತ್ತದೆ ಕನ
-ಮಯಾಸ

ಹೂವಿನ್ ಮ್ಯಾಲೆ ಚಿಟ್ಟೆ

ಹೂವಿನ್ ಮ್ಯಾಲೆ
ಚಿಟ್ಟೆ ಕುಕ್ಕುರ್ ಬಡ್ದಂಗೆ ಕುಂತಿದ್ದೆ
ಅದ್ಯಾವ್ ಗಳ್ಗೆಲಿ
ಚಿಟ್ಟೆ ಮ್ಯಾಕೆ
ನೊಣ ಬಂದ್ ಕೂತ್ಕಂತೋ
ನಾ ಕಾಣೆ...!
ಪಾತರಗಿತ್ತಿ ನಂಬಿದ್ದೋನು
ಪದರ್ ಗುಟ್ಟಿ ಹೋಗ್ಬಿಟ್ಟೆ
-ಮಯಾಸ

ಗರಬಡಿದಂಗ್ ಯಾಕಿದ್ದೀ..?!?

ತೋಳ್ಮೆಲೆ
ಮಲ್ಕಾ ಬೇಕಂದೆ
ಎದೆ ಬಡ್ತಾ ಕ್ಯೋಳ್ಬೇಕಂದೆ
ಯಾಕ್ ನಿನ್ ಸುತ್ತಾ
ಎಲ್ಲಾ ಬೊಬ್ಬೆ ಹೊಡಿತಿದ್ರೂ
ಗಪ್ ಚುಪ್ ಮಲಗಿದ್ದೀ
ಹರುಳ್ ಹುರ್ಧಂಗೆ
ಬಡ್ ಬಡಾ ಅಂತಿದ್ದೋಳು
ಗರಬಡಿದಂಗ್ ಯಾಕಿದ್ದೀ..?!?
-ಮಯಾಸ

ಯಂಡ್ ಕಣ್

ಯಂಡ್ ಕಣ್
ಇದ್ದಂಗಿದ್ವಿ
ನಿನ್ ನೋಡ್ರೆ
ಕನ್ನಡಿಯೊಳ್ಗೆ
ನನ್ನೇ ನೋಡ್ಕಂಡಂಗಾಗದು
ನೆಪನೂ ಹೇಳ್ದೇ...
ಕಾಲ್ಕಿತ್ತಲ್ಲ-
ಪಳ್ಪಳಂತ ಹೊಳಿತಿದ್ ಕನ್ನಡಿ
ಪಳ್ಳ್ ಂತ
ವಡದೋದಂಗಾತು ಕನ..!
-ಮಯಾಸ

ಮಾಯಾಸನ ಹನಿ ಸಾಲು.

1
ನನ್
ಮರ್ತ್ಬುಡು ಅಂದ್ಯಲ್ಲಾ
ನಿನ್
ಅಡ್ಡಡ್ಡ ಕೊಚ್ಚಿ
ಉದ್ದುದ್ದ ಸೀಳ್ಬೇಕು
ಅನುಸ್ತು ಕನ
ಯೋನ್ ಮಾಡ್ಲಿ..?
ನೆಚ್ಕಂಡು-ಮೆಚ್ಕಂಡವ್ನಲ್ವಾ
ಹಲ್ ಕಚ್ಕಂಡ್
ಸುಮ್ಕಾಗ್ಬುಟ್ಟೆ
-ಮಯಾಸ

2
ಕನ್ಸೊಳ್ಗೆ
ನೀ-ಹಿಂಗ್ ಬಂದ್
ಹಂಗ್ ಹೋದ್ರೂ
ಎದೆ ಹಿಚ್ಚುದಂಗಾತದೆ
ಕರುಳು ಚುರ್ ಅಂತದೆ
ಅಯ್ಯೋ...ಅನ್ಕಂತೀವ್ನಿ
ಕಣ್ ತುದೀಲೆ
ಬುಳ್ ಅಂತ ನೀರ್ ಚುಮ್ತದೆ
-ಮಯಾಸ

3
ಪ್ರೀತಿಸ್ಲಾ ಅನ್ಬುಟ್ಟೆ
ಏನಾತು ನೋಡೀಗ
ನಿಮ್ಮಪ್ ನೋಡ್ರೆ
ಜಾತ್ ಬ್ಯಾರೆ ಅಂತವ್ನೆ
ಸುಮ್ಕಿರ್ಲಾ ಅನ್ಬ್ಯೇಡ
ಯಂಡ್ ಪ್ರಾಣುಕ್ಕು
ಕುತ್ ಬತ್ತಾದೆ..!
-ಮಯಾಸ

4
ಹೆಣ ಬುದ್ರೂ
ಕಣ್ಣೀರಾಕ್ದ
ಮನ್ಸಾ ನೀನು
ಯಾಕ್ಲಾ
ಅವುಳ್ಯಾವ್ಳೋ
ಕೈ ಕೊಟ್ಬುಟ್ಲೂ ಅಂತ
ಗೋಳಾಡ್ಕಂಡ್
ಕಣ್ಣೀರಾಕ್ತಿ...???
-ಮಯಾಸ

5
ಜೊತ್ಜೊತಿಗೆ
ನಡಿಕಂಡೆ ಬತ್ತಿದ್ದೋಳ್
ಒಂದ್ ಹೆಜ್ಜೆ ಹಿಂದ್ಕಿಟ್ಟಲ್ಲೇ
ಆ-ಹಿಂದ್ಕಿಟ್ ಹೆಜ್ಜೆಯಡೀಲಿ
ನನ್ ಕನ್ಸೆಲ್ಲಾ ಚೆಲ್ಯಾಡಿ
ಚಿಂದಿಯಾಗೋಗ್ಬುಟ್ವು ಕನ
-ಮಯಾಸ