ಸೌದೆ ವಲೆ ಸ್ನಾನದ ಮಜಾನೆ ಬ್ಯಾರೆ

ಸೌದೆ ವಲೆಲಿ ನೀರ್ ಕಾಸ್ಕಂಡ್

ಹಂಡೆ ನೀರ್ಸಾನ ಮಾಡೋ ಮಜಾ

ಗೀಜರ್ರೂ-ವಾಟ್ರು ಹೀಟ್ರೂ ಕಾಯ್ಲಲ್ಲಿ ಇಲ್ಲ ಕನ..!

ಬೇಲಿ ಅಂಡೆ ಪುಳ್ಳೆ ಮುರ್ದು-

ನೀರೊಲಿಗಿಟ್ಟು...ಕೊಳ್ಪೆತಗಂಡ್ ಉಪ್ ಅಂದ್ರೆ

ದಗ್ಗಂತ ಬೆಂಕಿ ಹೊತ್ತುರಿಯೋದು ಕನ..!

ಬೆಳ್ಗಾನ ಎದ್ ನೀರ್ವಲೆ ಮುಂದ್ ಕೂತು

ಮೈ ಕೈ ಕಾಯ್ಸ್ ಕಂಡ್ -

ಬರ್ಕಾಪಿ ಹಿಗ್ತಿದ್ ಮಜಾನೆ ಬ್ಯಾರೆ ಕನ..! 

ಈಗ್ಯಲ್ಲಾ ಸೋಪಾಕ್ ನೀರ್ ಹೂಕಂಡ್ರೆ 

ಸಾನ ಮುಗೀತ್ ಕನ-

ಬೈನೇಬೀಳ್ ಕತ್ತಾ ತಗಂಡ್ ಉಜ್ಕಾಬೇಕಿತ್ತು ಕನ..!

ಇದ್ಲು ತಗಂಡ್ ಹಲ್ಲುಜ್ಜೋವಿ

ಹಲ್ ನೋವಾದ್ರೆ ಉಪ್ಪಲ್ಲಿ ತಿಕ್ಕಳವಿ 

ಬ್ಯಾವಿನ್ ಕಡ್ಡಿ - ಕಳ್ಳಿ ಕಡ್ಡಿ ಸಿಕ್ರೆ ಅದ್ರಲ್ಲೇ ತಿಕ್ಖಳ್ಳವಿ..!

ಸೌದೂ ಇಲ್ಲ , ವಲೂ ಇಲ್ಲ, ಕೊಳ್ಪೂ ಇಲ್ಲ

ಹಾಲಿಲ್ದ್ ಕಾಪಿ ಕುಡ್ಯಾಕ್ ಅಕ್ಕುಲ್ಲ

ಕಳ್ಳಿ ಬಡ್ಡೆ ಕಾಣಾಕಿಲ್ಲ..ಯಾಕೋ ಎಲ್ ನೆನಪಾತು ಕನ

ಕಾಲ್ ಬದ್ಲಾತೋ.....?

ನಾ ಬದ್ಲಾದ್ನೋ ಕಾಣೆ..!!!

-ಮಯಾಸ